Read Thangal Naga ROMMITE 10 Bible Online

ROMMITE 10 - Thangal Naga bible

ROMMITE 10

¹Unaute aw, Israelte ding a ka lunggulh pen leh Pasian kiang a ka thumna pen ahihleh, hundam a ahung omtheihna ding uh ahi!

²Ajiak pen Pasian lam ah kuhkalna anei uh chih ka theih pih hi, hinanleh theihna dungjuiin pen ahikei uhi.

³Ajiak Pasian diktatna theilou in amauh diktatna sukkip sawm in, Pasian diktatna ah aki tuhlut nuam kei uhi.

⁴Ajiak agingta jousiahte a dingin Krist pen diktatna muhna dingin dan suktawpna ahi.

⁵Ajiak Mosi in: “Dan a diktatna juite pen hua diktatna in ahing ding,” chi`n agelh hi.

⁶Hinanleh ginna a diktatna in hichi`n achi hi, “Na lungsim in van ah kua akahtou diai?” (huapen tunglam a pat Krist puikhiat ding chihna ahi.)

⁷“Ahihkeileh leinuai ah kua akumsuk diai?” chiken, (huapen misi lak a pat Krist puikhiat ding chihna ahi) chi in.

⁸Hinanleh bang ahia agen: “Pasian thu in a hungnaih hi, nakam leh na lungtang ah a om hi,” huapen, ginna thu ka gen pen uh ahi.

⁹Na kam a Jesu pen Toupa ahi chia naphuan a, misi lak a kipat Pasian in a kaithou chih na lungtang a nagintat leh hundam in na om ding hi, chih.

¹⁰Ajiak pen min lungtang in agingta ua, diktatna amujel uh, kam in aphuang ua, hundamna atang jel uhi.

¹¹Ajiak Pasian Laisiangthou in, “Kuapeuh amah ginta tuh azahlak kei ding,” achi hi.

¹²Ajiak Judate leh Grikte ki lamdanna bangmah a om kei hi. A un ua tung ah Toupa khat hi a, tualeh amah samjousiahte tung ah hoihna ahau hi.

¹³“Kuapeuh Toupa min lou taphot hundam in aom ding uhi.”

¹⁴Ahihleh agintaklouh pi uh bangchi`n asamthei ding ua? Tualeh athu ajaklouhpi uh bangchi`n agingta ding ua, tualeh agentu omloupi`n bangchi`n ajathei ding ua?

¹⁵Tualeh sawl ahihkeileh bangchi`n agenthei ding ua, khamuanna “Tangthupha leh silhoih kipak huai hung tutte keng kilawm hina tazen e!” chia gelh bang in.

¹⁶Hinanleh tangthupha aun un a ngaikhia kei uhi, ajiak Isaiah in, “Toupa, ka thugen uh kuan ahia agintat?” anachi hi.

¹⁷Tuachi`n ginna pen jakna jiakin ahung om a, tualeh jakna pen Pasian thu jiakin ahung om hi.

¹⁸Hinanleh kachi ahi: Amau`n jalou ahi ding uai le? Jatham e! “Athawm uh leitung pumpi athawn suak a; athu uh kawlmong tan dongin athangta hi.”

¹⁹Hinanleh kachi ahi, Israelte`n theilou ahi ding uai? Amasa in Mosi in, “Nam a gentham louhte zang in kung thangsiasak ding a; tualeh nam mawlte zang in kung hehsak ding hi,” ana chi hi.

²⁰Tualeh Isaiah in, hangsan takin, “Ahung zongloute kiangah muhkhiat in ka om a; ahung samloute kiang ah hihlat in ka omta hi,” achi hi.

²¹Hinanleh Israelte kiangah, “Mi thumangloute leh nialhatte dingin sun nitum in kaban kajak hi,” chi`n agen hi.