Read Thangal Naga ROMMITE 11 Bible Online

ROMMITE 11 - Thangal Naga bible

ROMMITE 11

¹Ahihleh Pasian in amite paikhiata ahi diai le? Paikhia baihlou! Ajiak kei zong Israelmi Abraham suan, Benjamin phung a mi ka hi.

²Pasian in ami a theihkholhte a paikhia kei hi, Pasian Laisiangthou in Elijah thu agen theilou nahi uh maw. Aman Israelte tungthu Pasian kiangah atut a:

³“Toupa, na Jawlneite athat ua, na maitamte a suchim ua, tualeh keimah tang in aka om a, keizong thah ahung sawm uhi,” chi in.

⁴Hinanleh Pasian in adawnna ah bangchi`n agen ei? “Baal lim mai a khupdin ngailou mi sang sagih keimah a dingin ka sitlai hi,” chi`n adawng a.

⁵Tuachimah bangin tulaiin zong hehpihna dungjui a tel amok aom nalai hi.

⁶Tualeh hehpihna jiak ahihtak a ahihleh, nasep jiak ahita kei hi, atuachih keileh hehpihna pen hehpihna ahitakei ding hi. Hinanleh nasep jiak ahihleh pen, hehpihna jiak ahitakei ding, atuachih keileh nasepna zong nasepna ahita kei ding hi.

⁷Ahihleh bangchi ahita diai le? Israelte`n azon uh amuta kei ua, hinanleh telten amu uh, adang tengteng mit tawtsak in a omta uhi.

⁸Tuni mah mah in akiang uah, “Khuaphawklou a omna kha apia a, amuh theihlouhna ding uh mitte leh, ajak theihlouhna ding uh bilte tawh,” chih gelh bang in.

⁹Tualeh David in, “A dohkante uh amauh a dingin thang leh pial leh; pukna leh phuba lakna hung hi hen!

¹⁰amuh theihlouhna ding un amitte uh hung mial henla; tualeh a ngum uh kunsak jing in,” achi hi.

¹¹Tuachi`n kachi ahi: A kipalpukna uh apukden nang uh ahi diai le? Hilou e! Hinanleh apuk jiakin amauh thangsiatsak na dingin Jentelte kiangah hundamna ahung tungjawta hi.

¹²Tualeh apuk uh bawn leitung hihhauhsakna ahih a, tualeh akiamna uh zong Jentelte hauhsakna ahihleh, abukimna uh bangjahta a hauhsakna ahita diai le!

¹³Nou Jentelte kiangah ka gen ahi: kei Jentelte sawltak ka hihjiak in ka nasepna ka pahtawi hi.

¹⁴Bang chidan hiamkhat a ka chipihte ka thangsiatsak a, alak ua khenkhatte beek ka hutdam theihkhak leh chi in.

¹⁵Ajiak amauh paihkhiatna bawn leitung tawh kituahkikna ahihleh, amauh deihkikna pen sihna a pat hinna ahihkeileh bang ahi diai!

¹⁶Ajiak gah masa asianthou leh alompi zong tuachihmah bangin asiangthou hi. Tualeh azung asianthou leh, abate zong tuachimah bang in asiangthou hi.

¹⁷Tualeh aba khenkhatte suktan a aom a, nang olive taklou, alak ua phuhlut a na om leh olive sing a hoihna kikoppih nahih jiakin.

¹⁸Tuachi`n ba dangte tung ah kiliansak ken, hinanleh kiliansak nanlechin azung vaktu nangmah nahi kei a, azung pen nang hung vaktu ahijaw hi.

¹⁹Tuachi`n nang, “Ahi, phuhlut a ka omtheihna dingin bate suktan a om ahi,” nachi ding hi.

²⁰Adik ahi, agintaklouh jiak un ahi suktan a aom uh, tualeh nang na ginna jiakin nading ahi, kisathei kenla, hinanleh laujaw in.

²¹Ajiak Pasian in aba taktakte a khawikei leh, nang zong ahung khawi tuan kei ding hi.

²²Tuajiakin Pasian hoihdan leh thukhauhdan ngaihtuah in, apukte tung ah a thukhauh ahi, nang lam ah ahoih ahi, ahoihna a na omjing leh, atuachih keileh nang zong satkhiat in na om thou ding hi.

²³Tualeh amauh zong gingtalou a a omjing kei uleh, phuhlut in a om ding uhi, ajiak Pasian in amauh aphutlut thei hi.

²⁴Nang, piandan a olive taklou a pat satkhiat bawn piandan lou tak a olive singhoih a phuhlut a na omleh, hih aba takte pen bangzahta a phuhlut in aom tazen ding uai.

²⁵Ajiak unaute aw, na kipilsak louhna ding un, hih thugu`k, Jentelte bukimna a hungtun masiah Israelte tung ah theihsiam louhna bangtan hiam a hungtung tadih ahi, chih natheih louh uh ka deih kei hi.

²⁶Tualeh Israelmi jousiah hundam in a om ding uhi. Laisiangthou a, “Zion a kipan in hundampa ahung pai ding a Jakob a kipat Pasian ngaihsak louhna a hihmang ding hi.

²⁷Ajiak a khialhnate uh ka lakmang tak chiangin akiang ua ka thukhun ding pen hih ahi,” chih gelh bang in.

²⁸Tangthupha lam ngaihtuah in pen nou jiakin melma ahi ua, hinanleh tel thu lam ngaihtuah in pen pu leh pate jiakin deihtakte ahi uhi.

²⁹Ajiak Pasian in a silthawn piak ah leh asapna ah lungsim akhek ngaikei hi.

³⁰Ajiak nidanglai in Pasian na gingta kei ua, hinanleh tuin amauh awilouh jiakin zahngaihna na muta uhi.

³¹Tuachimah bangin nou ahung hehpihna jiak a zahngaihna a muhtheihna ding un, tuin hihte`n zong gingtalou ahita uhi.

³²Ajiak Pasian in ahehpih chiat theihna dingin mijousiah pen thuman louhna nuai ah a khumsiangta hi.

³³Pasian pilna leh theihna thuk hina lawm lawm e! A vaihawmnate zon guallouh leh alampite muhguallouh hina tazen e!

³⁴Ajiak Laisiangthou in hichi`n agen hi, “Toupa lungsim kuan ahia athei? ahihkeileh kua ahia a lemguatpihtu a pang?

³⁵Ahihkeileh, adit kik ding a zong, kuan ahia akiang a silpia masa phot?”

³⁶Ajiak amah a kipan leh, amah jiak leh, amah ding a sil jousiah om ahi, amah kiangah tangtawn in thupina om hen! Amen.