Read Thangal Naga ROMMITE 12 Bible Online

ROMMITE 12 - Thangal Naga bible

ROMMITE 12

¹Tuajiakin unaute aw, Pasian kiang a na pumpi uh kithoihna hing leh, siangthou leh, Pasian pomta`k ding a kilan dingin Pasian zahngaihna jiakin kung ngen hi, huapen na biakna dan ding him uh ahi.

²Tualeh hih leitung dan bangin om kei unla, hinanleh Pasian deihlam hoih leh pomtak leh hoihbukim bang ahia chih na theihchian theihna ding un na lungsim uh athak a om in hung lamdang jawta un.

³Ajiak pen ka kiang a hung kipia hehpihna jiakin, nalak ua mi kuamah in a kiletsak ding hun val a kiliansaklou in, hinanleh Pasian in michih kiang a ginna apiak hun bang jel a diktak a ngaihtuah jaw dingin kachi ahi.

⁴Pumpi khat ah hiang tampi inei ua, tualeh hiang jousiah nasep a kibaklouh mah bang in.

⁵Eite tampi hinanlei zong Krist ah pumpi khat ihi a, khat leh khat iki hiangtuah chiat uhi.

⁶I kiang a hehpihna hung kipia dungjuiin silthawnpiak tuamtuam inei a, thugen ding ahihleh iginna utoh kituak in igen ding uhi;

⁷nasep ding ahihleh isem ding uh, thuhilh dingin zong hilh hen;

⁸hasottu in zong hasot hen, sil piatu in zong itlouin pia hen, vaihawmtu in zong taima takin hawm hen, mi khuatuahtu in zong kipak takin khuatuah hen.

⁹Itna ahihleh lepchiahna panglou in hi hen, gitlouhna mawng mawng hua unla, hoihna jousiah tu tinten un.

¹⁰Sanggam ki itna in khat leh khat ki lainat tuah chiat unla, ki zahbawl na lam ah kideihsak tuah chiat un.

¹¹Taimak lam ah thadah kei unla, khalam ah phattuam ngai un, Pasian nna sem un.

¹²Kinepna lam ah kipak jingin, gimthuakna lam ah thuak teitei un, thumna lam ah kuhkal jing un.

¹³Misiangthoute taksap awng hu unla, jindou nasiam un.

¹⁴Ahung gawtte gualjawl unla, gual jawl un, hamsiat kei un.

¹⁵Kipakte kipahpih unla, kapte kahpih un.

¹⁶Khat leh khat ngaihtuah kibang in om un. Kingaihtuah sang talua kenla, mineu nou noute tawh kipawl jaw un, kipilsak kei un.

¹⁷Kua gitlouh gitlouh in thuk kei un, mijousiah mitmuh ah sil kilawm bawl ding sawm un.

¹⁸Ahihtheih liaileh natung a ki-nga zah zah ah ki-nga in, mijousiah tawh kilem in om in.

¹⁹Deihtakte, phuba kilatuah kei un, hinanleh hehna Pasian awnjaw un, ajiak hichibang a gelh ahi, “Phulak him him keimah a ahi, keiman kathuk na ding, Toupa`n achi hi.”

²⁰Tuajiakin, “Na melma agil akial leh nek ding pia in, adang atak leh dawnding pia in, ajiak tuachibang a nabawl leh alutung ah mei-am na sekhawm ahi ding hi.”

²¹Gitlouh zoh in omkenla, hoihna tawh gilou joujaw in.