Read Thangal Naga ROMMITE 13 Bible Online

ROMMITE 13 - Thangal Naga bible

ROMMITE 13

¹Michih atung a vaihawmtute thu thu in om hen, ajiak Pasian thu louin kuamah vaihawm a om kei hi, vaihawmtu a omte Pasian guat ahi.

²Tuajiakin kuapeuh vaihawmtu nial pen Pasian silguat kalh ahi. Tualeh akalhtuten amauh tung ah siamlouh tansakna amu ding uhi.

³Vaihawmtute pen silhoih bawlte a dingin lauhuai ahi kei ua, hinanleh migiloute a dingin lauhuai ahi uhi. Ahihleh vaihawmtu laulou a om na ut ei? Silhoih bawl in, tuachi`n apahtak nalawh ding hi.

⁴Ajiak amah pen na hoihna ding a Pasian nasemtu ahi. Hinanleh sil gilou na bawl leh lau in, ajiak aman a namsau a mawktawi kei hi, amah pen Pasian nasemtu sil gilou bawlte tung a hehna phuba latu ahi.

⁵Tuajiakin Pasian gawtna laujiak guak hilouin, na sia leh pha theihna jiakin zong vaihawmtute thu thu a na om ding mawng ahi.

⁶Hih jiakin siah zong napia uhi, amauh pen hih silte bawl ding a Pasian nasem ahi uhi.

⁷Tuajiakin mijousiah kiangah atan ding lawm uh pia un, leiman piakna dingpa kiangah leiman, siah piakna dingpa kiangah siah, tualeh amauhte zahtak un.

⁸Ki it tuahna loungal kuamah bangmah bakei un, ajiak midang itpa in dan ahih bukim hi.

⁹Ajiak hih thupiakte`, “Ang na kawmlouh ding ahi, tual na thahlouh ding ahi, na guklouh ding ahi, theihpihtu diklou a napanlouh ding ahi, na englouh ding ahi,” tualeh hihlou thupiak dang mawng mawng aom leh, huate, “Nangmah na ki it bangin na innvengte it in,” chih in a khaikhawm siang hi.

¹⁰Itna in a innvengte a bawlsia ngaikei a, tuajiakin itna hi dan juihkimna ahi.

¹¹Tualeh igintat tunglai sang un i hundamna ni anaijawk taak jiakin ihmutna a pat khanlawh ahun mahmahta hi chih hun omdan ah nathei uhi.

¹²Jan abei dekdekta a, khua vak ding ahi ta, tuajiakin mial nasepte ipaikhia ding ua, vak thuam in iki thuam ding uhi.

¹³Sun a om bangin, hoihtak in i om ding uhi, omdan valseng leh uain kham buai a omlou in, huk leh kingaihhat a om louin, tualeh kihau leh ki thangsiat a omlou in.

¹⁴Tuasang in Toupa Jesu Krist in kithuam unla, na taksa utna uh tangtung sak dingin bangmah kibawl kei un.