Read Thangal Naga ROMMITE 14 Bible Online

ROMMITE 14 - Thangal Naga bible

ROMMITE 14

¹Ginna a hatloumite, aginlahnate kiselpih kei unla, ngai un.

²Mi khat in bangkim nethei in aki gingta a, hinanleh mi khat in anteh louhing guak ane hi.

³An nete`n aneloute simmawh kei henla, tualeh aneloute`n zong anete gensia kei uhen, ajiak Pasian in amah a kipahpihta hi.

⁴Midang sila gensiatu nang kua na hia? Adin leh apuk apu a ding ahi. Tualeh amah pen dinsak in a om ding hi, ajiak Pasian in amah a dingsakthei hi.

⁵Mi khat in ni khat nidang sangin angai thupijaw tuam a, mi dangin ni tengteng aki bangin angai hi. Michih amauh lungsim chiat ah ki theichian uhen.

⁶Ni tangpa in Pasian zahna in atang a, tualeh ni tangloupa`n Toupa thupina ding a tanglou ahi. Bangkim nepa`n Pasian kiangah kipahthu agen a, Toupa pahtawina dingin ane a, tualeh aneloupa`n zong Pasian kiangah kipahthu gen in anelou ahi.

⁷Ajiak kuamah eimah a ding a hing i om kei ua, tualeh kuamah ei a ding a si zong ihi kei uhi.

⁸Ajiak pen ihin leh Toupa a ding a hing ihi ua, isih un zong Toupa a dingin isi uh ahi.

⁹Ajiak misite leh mihingte Toupa a ahihtheihna dingin Krist asi a athoukik a, tualeh hinsak in a om hi.

¹⁰Hinanleh nang bangding a na sanggam gensia nahia? Ahihkeileh nang bangding a na sanggam simmoh na hia? I un ua Krist vaihawmna touna mai a dingchiat ding ihi uhi.

¹¹Laisiangthou a, “Keimah ahing tawntung Pasian ka hi, Toupa`n achi hi, Toupa`n khup tengteng ka maiah akun ding ua, lei tengteng zong Pasian mai ah a kiphuang ding uh,” chih gelh bang in.

¹²Tuachi`n i unpi un Pasian kiangah itanchin chiat uh igen ding uhi.

¹³Tuajiakin khat leh khat iki gensia nawn kei ding ua, hinanleh kuapeuh in a sanggam kisuihkhak nang hiam ahihkeileh kipuk nang bangmah bawllouhna ding ngaihtuahjaw hen.

¹⁴Sil amah a sianglou mawng mawng aom kei chih, Toupa ah ka theichian a, ka taksan mahmah hi, hinanleh banghiam khat sianglou a ngaihsuntu dingin, huapen amah a dingin sianglou ahi.

¹⁵Hinanleh na annek jiak a na sanggam adahsak leh itna dan in na gamtang kei a ahi. Asih tang a Krist in asihsakpa pen na annek in hihmang ken!

¹⁶Tuajiakin na hoihna uh pen gilou a gen in omkei hen.

¹⁷Pasian gam pen nek leh dawn thu ahi ki a, hinanleh diktatnate, kilepnate, tualeh Khasiangthou a kipaknate ahijaw hi.

¹⁸Ajiak kuapeuh hih silte a Krist nasem tuh Pasian kipahpih leh mihing pahtat in a om jel uhi.

¹⁹Tuajiakin kilepna ding leh kisuk-halhna ding silte idelh ding uhi.

²⁰Na annek in Pasian nasep susia ken, sil tengteng asiangthou ngei ahi, hinanleh asilnek in mi ahihpuk leh anepa dingin silsia ahi.

²¹Na sanggam pukna ding hiam ahihkeileh hehna ding hiam ahihkeileh hatlouhna ding hiam ahihleh sa neklouh, uain dawnlouh, tualeh sil bangmah bawllouh ahoih hi.

²²Ginna nanei ei? Pasian mai ah nangmah guak in kineih in. Amah hoihsak lam a siamlouh kitangsak lou mi pen ahampha hi!

²³Hinanleh ginglahmi in anek leh ginna a anek louh jiakin siamlouh tang in a om hi. Sil khat peuh ginna lou a bawl pen khialhna ahi.