Read Thangal Naga ROMMITE 15 Bible Online

ROMMITE 15 - Thangal Naga bible

ROMMITE 15

¹Tuachi`n ei ahatten eimah nopna ding bawllou in, ahatloute hatlouhna i thuakpih ding uhi.

²Michih in i innvengte khantouhna ding a, ahoihna ding un iki paksak ding uhi.

³Ajiak Krist in zong ama kipahna ding angaihtuah kei a, “Hinanleh nang hung sialphoute sialphouna pen ka tung ah atuta hi,” chia gelh bangin.

⁴Ajiak nidanglai a kigelh jousiah Pasian Laisiangthou a, kuhkalnate leh khamuanna jiak a eiten kinepna i neihtheihna ding a, eite kihilhna ding a gelh ahi.

⁵Tuachi`n kuhkalna leh khamuanna Pasian in, Krist Jesu mahbang in khat leh khat lungsim kibang in hung omsak hen,

⁶Pasian I Toupa uh Jesu Krist Pa ngeiin lungsim munkhat pua in leh aw khat suah a na pahtawi theihna ding un.

⁷Tuajiakin, Krist in zong, Pasian thupina ding a ahung kipahpih mahbang in, khat leh khat ki pakta chiat un.

⁸Tuin huate ahi ka gen, pu leh pate kiang a thuchiamte hihkip dingin, Jesu Krist pen Pasian thudik theihsakna dingin teptante sila ahung hita hi,

⁹ahehpihna jiak a Jentelte`n Pasian apahtawi theihna ding un, “Hihjiakin Jentelte lak ah kung pahtawi ding a, namin phat in la kasa ding hi,” chih gelh bang in.

¹⁰Tualeh, “Nou Jentelte, kamite tawh kipak un, achi kik a!”

¹¹Tualeh, “Nou Jentelte jousiah, Toupa pahtawi un, mi tengteng in zong amah phat un!” achi kik hi.

¹²Tualeh Isaiah in, “Jessai jungjam a om ding a; Jentelte tung a vaihawm ding a hung paidingpa, amah ah Jentelte a kinem ding uhi,” achi kik hi.

¹³Khasiangthou silbawltheihna jiak a kinepna na hauhtheihna ding un, kinepna Pasian in ginna a kipakna leh khamuanna chinteng in hung hihdim hen.

¹⁴Tualeh ka unaute aw, noupen pilna in nadim ua, pilna kim neiin naki hasuan tuah thei uh chih keimah mah ngeiin zong ka thei hi.

¹⁵Hitalehzong unaute aw, Pasian in ahung piak hehpihna jiakin nou hung theihsak kikna tawbang in akal laklak ah hangsantak in kagelh ahi.

¹⁶Jentelte lak a Krist nasem ka hihtheihna ding leh ka Jentel latte Khasiangthou suksiangthou ahih ua, kipahpih taak a hihtheihna ding un Pasian tangthupha nna kasem hi.

¹⁷Tuajiakin Pasian lam silte ah Jesu Krist ah ki thupisakna ding kanei hi.

¹⁸Ajiak Krist in Jentelte thumang sak ding a thu gen leh nna sem a keimah zang a asil bawlte loungal bangmah ka gen ngam kei hi,

¹⁹chiamtehna thupi taktakte leh sillamdangte in, Pasian Khasiangthou silbawltheihna in. Tuachi`n Jerusalem khua leh akimvel gam a kipan Illirikam gam tanpha in Krist tangthupha kimtak in ka gen jouta hi.

²⁰Tualeh midang phuhsa tung a innlam ka hihlouhna dingin, tangthupa pen Krist min kilawhna sa mun a genlou in.

²¹Laisiangthou a, “Hinanleh a tanchin gen ngailouhnate`n amu ding a, aja ngai nailoute`n a hungthei ding uh chih gelh bangin, gen katum jaw hi.”

²²Hih jiakin na kiang ua hung paiding tamveipi dal in ka omta hi.

²³Hinanleh tuinjaw hihgam kimvel ah mun kanei takei a, tualeh kum tampi na kiang ua hungpai nuam in zong ka omta hi,

²⁴Spain gam a kapai hunhun ah na kiang uah kungpai ding hi; ajiak ka zinna a nou hung muh leh nou tomkhat hung kithuahpih a, hualam ka paina a nung khak uh zong ka kinem hi.

²⁵Hinanleh tuin misiangthoute nna sepsak dingin Jerusalem a paiphot ding ka hi hi.

²⁶Ajiak, Mesidonia leh Akhaia gammite`n Jerusalem khua a tagahte a ding a dangka tuakkhawm pha asata uhi.

²⁷Hih pen amauh utna mah tawh abawl uh ahi, tualeh aleiba uh zong ahi mawng hi. Ajiak Jentelte`n khalam silte a kikoppih uleh, taksa lam silte a amauh a panpih uh ahih ding mawng uh ahi.

²⁸Tuajiakin hih ka bawlzoh a, agah zong chiantak a ka muhsak zoh chiangin nou hung tawn in Spain gam ah kapai ding hi.

²⁹Tualeh na kiang ua kungpai chiangin Krist tangthupha gualjawlna kim tawh kung paiding chih ka thei hi.

³⁰Tuachi`n unaute aw, Pasian kiang a nung thumsakna uah chihtak hung suah dingin Toupa Jesu min leh Khasiangthou itna in kung ngen hi.

³¹Judea gam a gingloute lak a ka suahtak theihna ding leh Jerusalem khua a ding a ka nasepna pen misiangthoute kipakna ding zong ahih theihna dingin,

³²Pasian deihdan bang a, kipaktak a na kiang ua kung pai a, iki suk-halh khawm theihna ding un.

³³Lemna Pasian na kiang uah om hen. Amen.