Read Thangal Naga ROMMITE 16 Bible Online

ROMMITE 16 - Thangal Naga bible

ROMMITE 16

¹Kenkria khua a saptuam nasemtu, i sanggamnu uh Phoibi na kiang uah kung meltheihsak hi.

²Toupa min a misiangthoute bang a na napom ua, na panpih uh a ngaihna teng a na panpih ding un, ajiak aman zong mi tampi ana panpihta a, keimah ngei zong ahung panpihta hi.

³Krist Jesu a hung panpihte Prisila leh Akuila chibai hung buksak un;

⁴amau`n ka hinna a dingin a ngawng uh adawh ua. Amauh tung guak ah hilou in, Jentel saptuam jousiahte tungah zong kipahthu ka gen ahi.

⁵Tuachimah bangin a inn ua saptuam kikhawmte zong chibai hung buksak un. Akhaia gam a Krist a gah masapen, ittak Epaneta chibai hung buksak un.

⁶Na lak ua semgim Mari zong chibai hung buksak un.

⁷Ka chipihte lak a ka thong tangpih, sawltakte lak a zong a minthangtak, Krist a zong keisang a om masajaw Andronika leh Junia chibai hung buksak un.

⁸Toupa a ka ittak Amphliata chibai hung buksak un.

⁹Krist a i naseppih Urbana leh, ka ittak Staki chibai hung buksak un.

¹⁰Krist a mi ahih kichian Apelle chibai hung buksak un. Aristobala inkuan a mite chibai hung buksak un.

¹¹Ka chipih Herodion chibai hung buksak un. Toupa a om Norkissa inkuante chibai hung buksak un.

¹²Toupa a om Triphena leh Triphosa chibai hung buksak un. Toupa nna hahsep mahmah, ittak Persi chibai hung buksak un.

¹³Toupa a telsa Rufa leh anu, keinu zong hi, chibai hung buksak un.

¹⁴Asinkrita, Phlegon, Hermi, Petroba, Hermas tualeh akiang ua om unaute chibai hung buksak un.

¹⁵Philologa leh Julia, Neria leh a sanggamnu, tualeh Olimpa leh akiang ua misiangthou omte jousiah chibai hung buksak un.

¹⁶Kitawpna siangthou in chibai ki buktuah un, Krist a saptuamten chibai a hungbuk uhi.

¹⁷Tualeh unaute aw: kihilhna dan nou ahung kihilh nasan uh kalh lam a kikhenna leh pukna siamkhiatute chiamteh ding leh kiheisan dingin kung ngen hi!

¹⁸Ajiak pen huachibang miten I Toupa uh Jesu Krist nna asem kei ua, amauh gilpi nna asemjaw uhi. Tualeh kampha leh kamsiam in mimawlte akhem nak uhi.

¹⁹Ajiak na thuman dan uh mijousiah lak ah akithang a, tuajiakin natung uah ka kipak hi. Hinanleh silhoih lam a napil ua, sil gilou lam a namawl uh ka deih hi.

²⁰Tualeh lemna Pasian in setan pen tomkhat zoh chiangin nakeng nuaiah ahung tuandensak ding hi. I Toupa Jesu hehpihna na kiang uah om hen.

²¹Ka naseppih Timothi leh ka chipihte Lusia, Jason tualeh Sosipater in chibai ahung buk hi.

²²Keimah, Tertia, hih laikhak gelhpa in, Toupa min in chibai kung buk hi.

²³Gaia, keileh saptuam jousiah jintunnapa in chibai ahung buk hi. Khuasung dangka kemtu Erasta leh unaupa Kuarta in chibai ahung buk hi.

²⁴I Toupa uh Jesu Krist hehpihna na tung uah om hen. Amen.

²⁵Tuin amah ka tangthupha gen bang leh thugu`k kilakna bangbang a, Jesu Krist ki tangkoupihna bang a noute na ginna ua hung dingkipsak theipa, hua thugu`k pen tanglai sawtpi sung phualgu`k a na om.

²⁶Hinanleh tu a tangtawn Pasian thupiak dungjui a Jawlneite laibu in, ginna thumanna dingin nam jousiah kiangah theihsak in a omta hi.

²⁷Apil Pasian guak kiangah Jesu Krist jiakin tangtawn in thupina om hen. Amen.