Read Thangal Naga ROMMITE 3 Bible Online

ROMMITE 3 - Thangal Naga bible

ROMMITE 3

¹Ahihleh Judami in bang ahia hamphatna aneih tuan? Ahihkeileh teptan zong bang ahia a phattuam na?

²Lam jousiah ah, aphatuam hi! Pasian kamsuakte akiang ua kepsak a aom jiak uh ahi pen hi.

³Ajiak mi khenkhat in gingta kei mahle uh bang ahituan dia? Agintat louhna un Pasian gin-omna bangmah lou asuaksak diai le?

⁴Suaksak baih lou e! Pasian pen midiktat hi henla, hinanleh mi jousiah pen juauthei hijaw hen. “Na thugen a siamtang a na om a; vaihawmsak a na om chiang a zong na zohtheihna dingin,” chia gelh bang in.

⁵Hinanleh i diktatlouhna in Pasian diktatna a suklat sem leh bang igen tadia? Pasian in mi agawt chiangin mi diktatlou ahi diai? (Mihing bangin ka gen ahi)

⁶Hibaihlou! Ajiak huachi hitaleh Pasian in leitung vai bangchi`n ahawm tadia?

⁷Hinanleh ka juau genjiak a Pasian thu dikdan ama thupina khop hial a alatsem leh? Bangding a kei zong mikhial bang a siamlouh tansak a omlai ka hia?

⁸Tualeh bangding a, khenkhat in nunghek ua, ka gen louhpi nung gensak bang a, “Silhoih ahung pawt theihna dingin sil hoihlou i bawlding uh”? chia genjawlou ihi ua! Hichi bang mite`n siamlouh atan uh adik hi.

⁹Ahihtakleh bang? Amauh sangin ihoihjaw tuan uh maw le? Hoihjaw tuan baihbaih lou! Ajiak Judate leh Jentelte anih un khialhna nuai a omsiang ahi uh chih masang in a ngawh tave vua le.

¹⁰Hichia gelh bangin: “Kuamah midiktat mawng mawng aom kei uh, khat mah zong a om kei.

¹¹kuamah theisiam mawng mawng aom kei kuamah Pasian zong mawng mawng aom kei.

¹²Pasian a pan ahilou lam ah apial mangta uh; bang mah phatuamlou ahung suak mangta uh, kuamah silhoih bawl a om kei uh, khat mah zong a om kei uhi.

¹³A lawl uh han kihong bang ahi a, alei un khemna thu agen a, amuk uah gulgu a om hi;

¹⁴akamte uh hamsia lawhna leh khaatna in adim a,

¹⁵akalte uh sisan uah dingin akinsuan uhi;

¹⁶manthaina leh gentheihna a lampi uah aom a.

¹⁷Tualeh khamuanna lampi zong athei kei uhi,

¹⁸amit hah uah Pasian lauhna mawng mawng a om kei hi.”

¹⁹Tuin dan in sil khatpeuh agen taphot kam jousiah hum ahihtheihna ding leh, leitung jousiah Pasian mai a mohtang a a omtheihna ding un, dan nuai a omte kiang a agen ahi, chih ithei uhi.

²⁰Tuajiakin dan silbawlte jiakin kuamah Pasian mitmuh in siam tangin a om kei ding uhi, dan jiakin khial kitheihna hung om ahih jiakin.

²¹Hinanleh tuin dan leh Jawlneite`n atheihsak bang un dan panglou in Pasian diktatna suklat in aomta hi.

²²Tuapen Jesu Krist gintat jiak a, agingtate tengteng a ding a Pasian diktatna ahi, lamdanna mawng mawng a om kei hi.

²³Ajiak mi tengteng in sil a bawlkhialta ua, Pasian thupina atan zohlouh nung un.

²⁴Krist Jesu a om tatna jiakin, ahehpihna a athawn a siam tansak in a om uhi.

²⁵Pasian dawhzohna jiak a nidanglai a khialhnate uh kitheih mawh bawl a aom jiakin adiktatna etsakna dingin Krist Jesu pen a sisan a ginna jiak a khialhna thupha tawina hi dingin Pasian in abawlta hi.

²⁶Amah midiktat ahihtheihna ding leh, Jesu gingta jousiahte siam tangsaktu a hihtheihna ding a tulaia adiktatna etsakna ding ahi.

²⁷Ahihleh kisaktheihna ding khoi ah a om a? A omthei mawng mawng kei hi! Bang dan in ahia? Sil bawl dan in maw? Hilou, ginna dan in ahijaw hi.

²⁸Tuajiakin, mi`n dan silbawlte jiak hilou in, ginna jiakin siamtangin i ngai uhi.

²⁹Pasian Judate Pasian guak adiai le? Jentelte Pasian zong hilou maw? Hita lua, Jentelte Pasian zong ahi hi.

³⁰Teptante agintat jiak ua siam tangsak ding leh, tep tanloute agintat jiak ua siam tangsak ding Pasian khat guak ahi.

³¹Tuachi ahihleh ginna jiakin dan pen bangmah louin ibawl uh adiam? Bawl lou e, dan pen i hihkipjaw lehbung uhi.