Read Thangal Naga ROMMITE 4 Bible Online

ROMMITE 4 - Thangal Naga bible

ROMMITE 4

¹Ahihleh taksa dan a Ipa uh Abraham in amuh bang ahia igen ding uh?

²Nasep jiak a Abraham siam tangsak a aom leh suan ding anei hi, hinanleh Pasian lam ah hilou in.

³Laisiangthou in bangchi`n agen a, “Abraham in Pasian agingta a, hua ginna pen amah a dingin diktatna a sim ahi,” achi hi.

⁴Tuin amah a pan nasemtu thaman pen hehpihna a sim ahi kei a, bat a sim ahijaw hi.

⁵Hinanleh nna semlou a Pasian ngaihsak loute siam tangsakpa gingtajaw mi ginna pen diktatna a sim ahi.

⁶Mi, nasep panglou a Pasian in diktat a asim a gual ajawl sak thu David in zong:

⁷“A khialhnate uh ngaihdam a omte leh, a khialhnate uh khuh a omte ahampha uhi!

⁸Toupa`n khialhna neilou a asehte a hampha uhi.”

⁹Ahihleh hua hamphatna teptante tung guak a om ahi diam ahihkeileh teptanloute tung ah zong? “Abraham ginna pen adiktatna a sim ahi achi ngal a.”

¹⁰Ahihleh hua bangdan a sim ahia le? A teptan nungin ahia, a teptan masang in? A teptan nungin ahi kei a, a teptan masang in ahijaw hi.

¹¹Tualeh tep tanlou ahihlai a ginna a amuh diktatna theihna teptan chiamtehna amu a, tep tanlou hinanleh uh agingta jousiah pa ahih theihna dingin, diktatna pen amauh ding a zong seh ahihtheihna dingin.

¹²Tualeh tep tanloute a ding a tep tante pa guak ahi kei a, hinanleh Ipa uh Abraham tep tanlouh a a omlai a aginna neih bang a ginna neite pa zong ahi.

¹³Ajiak Abraham hiam ahihkeileh asuante kiang a leitung gouluahtu a hi ding chih thu dan jiak a chiam ahi kei a, ginna a diktatna jiakin ahijaw hi.

¹⁴Ajiak dan a mite gou luahtu ahih ding uleh ginna bangmahlou asuak ding a, thuchiam zong bangmahlou asuakta ding hi.

¹⁵Ajiak pen dan in thangpaihna asiam a, hinanleh dan omlouhna ah khialhna zong a om kei hi.

¹⁶Tuajiakin hehpihna jiak a ahihtheihna dingin, ginna jiakin ahi, suante jousiahin zong thuchiam pen pellou a muhtheihna ding un. Dan nei mite guak hilou in, i un ua Ipa uh Abraham bang a ginna nei jousiahin zong amu ding uhi;

¹⁷“Nam tampite pa in kungbawl hi,” chia gelh bang in. Misite hingsaktu leh a omloute aom bang a gentu agintat Pasian mitmuh ah.

¹⁸Kinep-huai a a omlouh in zong aman kinem takin agingta a, “nam tampite pa” ahung hihtheihna dingin. “Huachibang in nasuante ahung hi ding,” chia kigen dungjui in.

¹⁹Tualeh ginna a hatlou hilouin, ataksa sisa bang a om leh, amah pen kum jakhat vel ding mi ahi a, Sarah chiin zong angaihtuah kei hi.

²⁰Ginglahna jiakin Pasian thuchiam taksanlou in aom kei a, ginna ah ahat a, Pasian apahtawi hi.

²¹Tualeh thu aman achiam taphot pen a tangtung sak thei ahi chih theiin a gingta tinten hi.

²²Tuajiakin aginna pen, “adiktatna a sim ahita hi.”

²³Tualeh “aginna pen adiktatna a seh ahita,” chih amah jiak guak a gelh ahikei a.

²⁴Hinanleh misi lak a kipan a I Toupa Jesu kaithoupa igintat ua ahihleh eite a dingin zong diktatna asim ahi ding hi.

²⁵Hua Jesu pen i khialhnate uh jiakin piakkhiat in a om a, tualeh siam itanna dingin kaihthoh in a om hi.