Read Thangal Naga ROMMITE 6 Bible Online

ROMMITE 6 - Thangal Naga bible

ROMMITE 6

¹Ahihleh bang igen tading ua le? Hehpihna a khansemna dingin khialhna ah i omjing ding uh adiam?

²Omjing lou e! Eite khialhna lam a sisate bang chi`n khialhna lam ah ihing thei nalai lai diai?

³Ahihleh eite Jesu Krist a baptis a om jousiahte asihna ah baptis in i om uh ahi chih theilou na hi umaw?

⁴Tuajiakin a Pa thupina in misi lak a kipan Krist akaihthoh bang a eite zong hinna thak a ihintheihna dingin asihna ah baptisma in amah tawh vuiin i om uhi.

⁵Ajiak asihna kibakpih a amah tawh ina kizoptak uleh athohkikna kibakpih in zong ikizop ding uhi.

⁶Hih ithei uhi, khialhna pumpi hih mangthang a a omtheihna dingin, tu a kipat a khialhna sila a i om nawnlouhna dingin i mihing lui uh amah tawh kilhden in a omta hi, chih.

⁷Ajiak kuapeuh sitasa pen khialhna a pat in a suakta ta hi.

⁸Tualeh Krist tawh isihtak a ahihleh, amah tawh hing zong ihing ding uhi, chih igingta uhi.

⁹Krist tuh misi lak a kipat kaithoh in aom a, a sinawn kei ding chih theiin, sihna in atung ah thu anei nawn kei hi.

¹⁰Asihna pen khialhna lam thu ah khatvei si ahi a, hinanleh ahin ahihleh, Pasian lam ah ahing ahi.

¹¹Tuachimah bangin nou zong khialhna lam thu ah sisa in kingai unla, hinanleh Pasian lam thu ah I Toupa Jesu Krist jiakin hing in kingai un.

¹²Tuajiakin, duhgawlna thu mang ding in na pumpi sithei uah khialhna vaihawmsak kei un.

¹³Na pumpi hiangte uh zong diktatlouhna vanzak dingin khialhna kiangah piaphal kei un, ahihhang in misi lak a kipan a hingkik bangin Pasian kiangah kipia unla, na pumpi hiangte uh zong diktatna vanzak dingin Pasian kiangah piaphaljaw un.

¹⁴Ajiak khialhna in natung uah thu aneinawn kei ding hi, ajiak, dan nuaia om na hikei ua, hehpihna nuai a om na hi uhi.

¹⁵Ahihleh bang chita ding? Dan nuai a om hilou a, hehpihna nuai a om ihih jiak un ikhial ding uh ahi diam? Khiallou ding!

¹⁶Sihna ding a khialhna sila hi in, diktatna ding a thumanna sila hitaleh, kuakiang peuh ah zong thumang ding a sila a nakipiak nak uleh athu namanpa uh sila na hi uh chih theilou na hi uh maw?

¹⁷Hinanleh Pasian kiangah kipahthu tung hen! Khialhna sila ana himahle uchin zong, nou hung kipia thugin pen lungtang taktak in na juita uhi.

¹⁸Tualeh khialhna a kipan suahtaksak a om in, diktatna silate nung hita uhi.

¹⁹(Na taksa uh hatlouh jiakin mihing dan in ka gen ahi.) Na pumpi hiangte uh siangthou louhna leh gitlouhna hiang a sila ding a na napiak bang un, tu in na pumpi hiangte uh siangthouna dingin diktatna kiangah sila dingin pia un.

²⁰Ajiak khialhna sila nahihlai un diktatna lam a pat nana suakta uhi.

²¹Ahihleh tu a nasil jumpihte uah, hualaiin gah bang ahia le naneih uh? Hua silte tawpna lah sihna ahi ngal a!

²²Hinanleh tuin khialhna a pat suahtaksak a om a, Pasian silate na hung hih nung un sianthouna mukhop in nagah uh nanei ua, tualeh atawpna ah tangtawn hinna tawh.

²³Ajiak pen khialhna man sihna ahi a, hinanleh Pasian silthawnpiak pen I Toupa Jesu Krist jiakin tangtawn a hinna ahi.