Read Thangal Naga ROMMITE 8 Bible Online

ROMMITE 8 - Thangal Naga bible

ROMMITE 8

¹Tuajiakin, tuin Krist Jesu a om, taksa dan a omlou a kha dan a omjawte dingin siamlouh tansakna mawng mawng a om takei hi.

²Bang jiak ahia ichihleh Krist Jesu a om hinna dan in khialhna leh sihna dan a kipan in ahung suaktasak ta hi.

³Ajiak taksa hatlouh jiak a dan in a bawlguallouh Pasian in a Tapa in khialhna taksa gilou lim puain, tualeh khialhna ngaihdamna ding a hungsawl in taksa a khialhna om pen siamlouh a tangsakta hi.

⁴Taksa dan a pailou a kha dan a paijaw eite dan diktatnate hih tangtung a a omtheihna ding in.

⁵Ajiak, taksa dan a omten taksa lam silte a lunggulh ua, hinanleh kha dan a omten khalam silte a lunggulh uhi.

⁶Ajiak, taksa lam lunggulh pen sihna ahi a, hinanleh khalam lunggulh pen hinna leh khamuanna ahi.

⁷Sa lam lunggulh pen Pasian tawh kidouna ahihjiak in, huapen Pasian dan nuai ah a om kei a, omzong a om theilou mawng ahi.

⁸Tuachi`n taksa a omten Pasian a kipaksak theikei uhi.

⁹Hinanleh Pasian kha nou kiang a aom taktak a ahihleh, taksa a om na hikei ua, kha a om na hijaw uhi. Hinanleh mi kuapeuh Krist kha neilou pen amah a ahikei hi.

¹⁰Tualeh Krist nou a aom leh pumpi pen khialhna jiakin asi ahi, hinanleh kha pen diktatna jiakin ahing ahi.

¹¹Hinanleh misi lak a Jesu kaithoupa kha nou mauh a aom leh misi lak a kipan a Krist kaithoupa`n noumah a om kha jiakin na pumpi uh sitheite zong ahingsak ding hi.

¹²Tuajiakin unaute aw, bat inei hi, taksa dan a om ding in taksa dan a hilou in.

¹³Ajiak taksa dan a na om uleh nasi ngeingei ding uhi. Hinanleh pumpi sil bawlte kha a na hihlupjel uleh na hing ding uhi.

¹⁴Ajiak Pasian kha pui a om jousiahte pen Pasian Tate ahi uhi.

¹⁵Lau a omkik dingin sila hihna kha mu na hikei hi, hua kha jiakin “Abba Pa!” chi`n i kikou hi. [3]

¹⁶Pasian kha mahmah in eimah kha tawh Pasian tate ihi chih ahung theisak hi.

¹⁷Tualeh tate ihihleh gouluahtute ihi uh, akiang a pahtawi a i omtheihna ding a amah ithuakpih taktak leh Pasian gouluahtute Krist luahpihtute ihi uhi.

¹⁸Ajiak tulai a thuakgimnate pen denchiang a itung a thupina suklat a om ding tawh tehpih tham in ka ngaikei hi.

¹⁹Silsiam jousiah in kinem mahmah in Pasian tate kilakna ding a ngaklah mahmah uhi.

²⁰Silsiam jousiahte pen sil thulimlou thuthu a omsak in a omta uh. Amauh utthu hilou in kinepna nei a amauh omsaktu jiakin ahijaw hi.

²¹Ajiak silsiam jousiah zong siatna sila a pat suahtaksak a om in, Pasian tate noplenna thupi a lutding ahi uhi.

²²Ajiak silsiam jousiah tutan dongin mau leh nauveina thuak in a om uh chih ithei uhi.

²³Tualeh amauh guak zong ahi kei a, kha gah nei masa eite zong ta hihna, ipumpi uh tatna muhna ding ngak in, eite tanpha lungsim in imau uhi.

²⁴Ajiak kinepna in ahi hundam a i om uh, hinanleh muhtheih gige kinepna pen kinepna ahi kei hi, mi`n amuh gige ah bangding in akinem lailai dia?

²⁵Hinanleh imuhlouh ikineppih leh kuhkal takin ingak teitei hi.

²⁶Tuachimah bangin kha in ihatlouh nate apanpih jel hi, ajiak bangchi bang a thum ding ihi ua chih ithei kei ua, hinanleh kha in mauna gen-guallouh in ahung ngetsak hi.

²⁷Tualeh Pasian deihlam bang a misiangthoute ding a angetsak jiakin amah lungtang entu in kha deihlam bang ahia chih athei hi.

²⁸Tualeh Pasian itte, aman aseh bang a asapte dingin, sil jousiahin ahoihna ding un a semkhawm chiat hi chih ithei uhi.

²⁹Ajiak a theihkholhte ama tapa bang a om ding in asepkholh a, atate pen unau tampite lak a tamasa pen ahung hihtheihna dingin.

³⁰Tualeh asehkholhte pen sam zong asam a, tualeh asapte pen siam atangsak a, tualeh siam atansakte pen apahtawi hi.

³¹Ahihleh hihthute ah bang igen tadiai le? Pasian eilam a apan leh kuan ahia hung douthei ding?

³²Ama Tapa ngei zong khawilou a, i un ua hung piapa in bangding in sil jousiah athawn in amah tawh hung piakhawm lou ding ahia?

³³Pasian mitelte kuan ahia ahek ding? Siamtangsaktu Pasian lah ahi ngal a!

³⁴Kuan ahia siamlouh tangsak ding? Asi pen Krist ahi ngal a, tuaban ah athou kik jawta a, Pasian jiatlam ah a om a, hung ngetsaktu zong ahi!

³⁵Krist itna a kipan kuan ahia hung khen ding? Gimthuakna in maw, lungkhamna in maw, gawtna in ahia, kial in ahia, guaktang in ahia, lauhhuaina in ahia, namsau in ahia hung khen ding?

³⁶Laisiangthou a, “Nang mah jiakin thah in ka om uh; goh ding belamte bang a sim ka hi uh,” chia gelh bang in.

³⁷Khen baih lou ding, hihte tengteng ah ahung ittu jiakin gualtung tuangte sang a tungtuangjaw ihi uhi!

³⁸Ajiak sihna hiam hinna hiam, vantungmite ahiam, lalnate a hiam sil bawltheihnate ahiam, sil hung om dingte ahiam,

³⁹sanna hiam, thukna hiam, ahihkeileh silsiam dang mawng mawng in zong I Toupa Jesu Krist a om Pasian itna a kipan ahung khenthei kei ding chih chiantak in ka thei hi.