Read Thangal Naga ROMMITE 9 Bible Online

ROMMITE 9 - Thangal Naga bible

ROMMITE 9

¹Krist ah thutak ka gen ahi, Krist ah ka om, ka juau kei, Khasiangthou jiakin ka sia leh pha theihna in ahung theihpih hi

²ka lungtang ah haksatna thupitak leh lungkhamna daitheilou kanei hi

³ajiak ka unaute aw, taksa lam a ka chipihte tang in keimah Krist kiang a pat bawltuam khop hial in hamsia thuak in omleng kachi hi.

⁴Israelmi ahi ua, ta hihnate, thupinate, thukhunte, danthu piaknate, Pasian nna sepnate leh thuchiamte bang amauh neih ahi a;

⁵pu leh pate amauh ua ahi a, tualeh taksa lam thu ah Krist zong amauh lak a kipan a hung pawt ahi. Amah pen sil jousiah tung a om, tangtawn a pahtawitak Pasian ahi. Amen.

⁶Hinanleh Pasian thu bangmah lou bang in a omta chih ahikei a, ajiak Israel suante aun un Israelmi ahi siang kei uhi.

⁷Abraham suante ahihjiak un zong aun un tate ahisiang tuankei uhi, “Isak ah nasuan aki chi ding,” chih ahijaw hi.

⁸Huapen, taksa tate Pasian tate ahi kei ua, hinanleh thuchiam tate pen Abraham tate a ngaih ahijaw uh chihna ahi.

⁹Ajiak pen thuchiam hihmi ahi, “Tu-hun bang in kung pai ding a, Sarah in tapa anei ding chih.”

¹⁰Tualeh huaguak ahi kei a, hinanleh Rebekka in zong, mi khat ipu uh Isak lak ah nau apai laiin.

¹¹Naupangte zong piang nailou in silhoih leh silsia zong bawl nailou in, tellam thu ah Pasian silguat a dettheihna dingin, silbawljiak hilouin, asamtu deihjiak hijaw in,

¹²a kiangah, “A upajaw in anaujaw nna a sepsak ding,” Pasian in achi hi.

¹³“Jakob ka it a, hinanleh Esau ka hua hi,” chih gelh bang in.

¹⁴Ahihleh bang igen tadia le, Pasian ah diktatlouhna aom adiai? Om baihbaih lou.

¹⁵Ajiak aman Mosi kiangah, “Ka khuatuah ut taphot ka khuatuah ding a; tualeh ka lungsiat ut taphot ka lungsiat ding,” chi`n ana genta hi.

¹⁶Tuachi`n adeihpa jiakin ahikei a, ataipa jiakin zong ahituan kei a, hinanleh akhuatuahtu Pasian jiakin ahijaw hi.

¹⁷Ajiak Laisiangthou in Pharoah kiangah, “Hihjiak mah in kung tung ding a, nangmah a ka silbawltheihna ka etsak theihna ding leh leitung pumpi a kamin a thantheihna dingin,” achi hi.

¹⁸Tuajiakin Pasian in a ut taphot a khuatuah a, a ut taphot zong agenhak sak jel hi.

¹⁹Tuachi`n nang ka kiangah, “Bangding a aman i diklouhna hungkawk ahia? Adeihlam kuan akalh a?” nachi ding hi.

²⁰Hilou, hinanleh, aw mihing, nang Pasian dawng vialpa kua na hia? Silsiam in asiamtu kiangah, “Bangding a hichibang a hungsiam nahia achi ding maw?”

²¹Bel khengtu in bel leilom khat a pat belkhat deihhuaitak akheng ding leh, bel khat thulimlou tak a kheng dingin bel leilom tungah thu neilou amaw?

²²Tualeh hehna bel, mangthang ding a kilawmte tung ah Pasian in a thangpaihna leh a silbawl theihna latsak a ut a, athuakzoh hamham leh bang akhok diai.

²³Tualeh khuatuahna bel thupina tang ding a tanglai a pat ana guatkholhte tung a a hehpihna hauhdan ahihlat theihna dingin.

²⁴Tua khuatuahna belte pen Judate guak a pat kipan hilou in, hinanleh Jentelte lak a pat sapte, eite tanpha ihi uhi.

²⁵Hosia laibu a, “Ka mi hingailoute ‘kamite,’ kachi ding a, it ngailouhnu zong ‘itnu,’ kachi ding

²⁶Tualeh hichi ahung hi a, akiang uah, ‘kamite na hikei uh,’ chih mun ah, Pasian hing tate chih a sap in aom ding uh,” anachih bang in.

²⁷Tualeh Isaiah in zong Israelte tungtang thu ana tangkoupih a: “Israeltate pen tuipi sehnel bangin tam nanle uh asimawk teng guak hundam in aom ding hi.

²⁸Toupa`n tomkhat leitung ah nasep abawl ding jiakin aman hua nasep ajou ding a, tualeh diktatna in atomsak ding hi.”

²⁹Tualeh Isaiah mah in, “Mipite Toupa`n chi suangtu ding hung na khawisaklou hileh Sodom khua bangin itum tading a, tualeh Gomorrah bang a bawl in i om tading uhi,” chia ana genkholh bang in.

³⁰Ahihleh bang igen tadiai le? Diktatna deihlou Jentelte`n diktatna a phata uhi, ginna jiak a diktatna pen;

³¹hinanleh diktatna dan delh Israelte`n hua diktatna pen aphajou takei uhi.

³²Bang jiakin ahi? Ginna in adelh kei ua, dan silbawl a muhtheih bang a adelh jiak un ahi, “Ajiak pukna suang ah apukta uhi”

³³Laisiangthou a; “Ngaiin, Zion ah pukna suang leh, dalna suangpi kakoih hi. Kuapeuh amah gingta pen ajahlaksak kei ding hi,” chia gelh bang in.