Read Thangal Naga 1 KORINTE 1 Bible Online

1 KORINTE 1 - Thangal Naga bible

1 KORINTE 1

¹Paul, Pasian deihlam a Jesu Krist sawltak hiding a sap leh, i sanggampa uh Sosthene in,

²Korin khua a Pasian saptuam omte, Jesu Krist a suksiang, misiangthou hiding a sapte kiangah, gamchin a I Toupa, amauh leh eite Toupa Jesu Krist min lou jousiahte kiangah tawh:

³I Pa uh Pasian leh I Toupa uh Jesu Krist a pat, hehpihna leh lemna na kiang uah om hen.

⁴Jesu Krist a Pasian hehpihna na kiang ua hung kipia jiakin natung thu uah Pasian kiangah kipahthu ka gen gige hi.

⁵Sil bangkim ah thugen theihna chinteng leh theihna chinteng ah amah vangin hihhauhsat in na om uhi.

⁶Tuachimah bangin Krist thu theihsakna pen nou mauh ah hihkip ahita hi.

⁷Tuachi`n kha lam silpiak mawng mawng ah na taksapna uh omlou in, I Toupa uh Jesu Krist kilakna ding ngak a omjing na hi uhi.

⁸Aman I Toupa Jesu Krist ni chiang a gensiat bei a na omtheihna ding un atawp dongin zong ahung hihkip ding hi.

⁹Pasian amuanhuai hi, aman a Tapa Jesu Krist I Toupa uh tawh kipawlkhawmna ah ahung samlutta hi.

¹⁰Tualeh unaute aw, na un ua thu khat nagen ua, tualeh nalak ua kikhenna mawng mawng a om louhna dingin lungsim kikhat leh ngaihtuahna kibang a hoihtak a na kizop jawkna ding un Toupa Jesu Krist minin kung ngen hi.

¹¹Ajiak ka unaute aw, nalak uah kiselna aom chih na tungtang thu uh Kloe innkuanpihte genna kaja hi.

¹²Kagen hih ahi, noute tengteng in, “Kei Paul pawl ka hi; kei Apollo pawl ka hi; kei Kifa pawl ka hi; kei Krist pawl ka hi,” na chi uhi.

¹³Krist hawmkhen in a om ei le? Paul nou a dingin kilhdenin a om ei le? Ahihkeileh Paul minin baptisma na tang uai le?

¹⁴Krispa leh Gaia chihlouh nalak ua khat bek kung baptis louh jiakin Pasian kiang ah kipahthu ka gen hi.

¹⁵Atuachih keileh, keimah min a ka baptis ahi chi na om kha ding uhi.

¹⁶Ahi, Stephenate innkuan ka baptis a, huate lou midang ka baptis lam ka theikei hi.

¹⁷Ajiak Krist in baptis dingin ahung sawl kei a, tangthupha gen ding in ahung sawljaw, pilna a thu genlou in, atuachih keileh Krist kross bangmahlou asuak kha ding.

¹⁸Ajiak kross thu pen mangthangte dingin motna ahi a, hinanleh ei hundam a omte a dingin jaw Pasian sil bawltheihna ahi.

¹⁹Ajiak, “Mipil, pilna ka hihsia ding a mi pilvang, pilvan theihna ka hihmang ding hi,” chih gelh bang in.

²⁰Mipil khoi ah ahi? Laigelhmi khoi a awm ahia? Hih leitung a selhatmi khoi a awm ahia? Pasian in hih leitung pilna mothuaina suaksak lou amaw!

²¹Ajiak Pasian pilna ah, leitung pilna zang a Pasian atheihlouh nung un, thugen mothuaitak zang a agingtate hundam a om pen Pasian in pha asa hi.

²²Judate`n chiamtehna a ngen ua, Grikte`n pilna azong uh.

²³Hinanleh en Krist kilhden a aom thu igen uhi, huapen Judate a dingin kipalpukna, tualeh Grikte a dingin motna ahi;

²⁴hinanleh Judate hi`n Grikte hitaleh kuapeuh akisamte a dingin Krist pen Pasian sil bawltheihna leh Pasian pilna ahi.

²⁵Ajiak Pasian motna mihing sang in apiljaw a, tualeh Pasian hatlouhna zong mihing sang in ahatjaw hi.

²⁶Unaute aw, ahung sapna ngaihtuah dih un, taksa lam a mipil tampite, mihat tampite, milian tampite sap ahihlouh dan uh.

²⁷Hinanleh Pasian in mipilte a zahlaksakna dingin leitung sil mothuaite atel jawta a, tualeh leitung a sil hatte azahlaksak na dingin leitung sil hatloute atel jawta hi.

²⁸Tualeh leitung silsia leh simmoh huaite Pasian in atel a, sil omte bangmahlou a suahsak theihna dingin, sil omlou tan in atel hi.

²⁹Tuachi`n Pasian mai ah kuamah aki liansak theikei ding hi.

³⁰Hinanleh nou pen amah vangin Krist Jesu ah na om uhi, amah pen Pasian a pat eia ding a pilna, diktatna, hihsiangthouna tualeh tatkhiatna ding a bawl ahi.

³¹Tuajiakin Laisiangthou a akigelh bangin, “Asuang taphot in Toupa suang hen.”