Read Thangal Naga 1 KORINTE 10 Bible Online

1 KORINTE 10 - Thangal Naga bible

1 KORINTE 10

¹Tualou zong unaute aw, hihte na theihlouh uh ka deihkei hi, ipu ipate`n aun un meipi nuai ah ana om ua, tualeh aun un tuipi ana kan ua.

²A un ua meipi leh tuipi a Mosi kiang a baptis a aom ua.

³Tualeh a un ua khalam an kibang anek ua

⁴tualeh aun un khalam dawn ding kibang a dawnchiat uhi. Ajiak amauhte juitu khalam suangpi a a dawnchiat uhi; hua suangpi pen Krist ahi.

⁵Hinanleh alak ua mi tampite tung ah Pasian a lungkim takei a, gamdai ah apumpite uh thehjakin aomta uhi.

⁶Sil gilou alunggulh bang ua i lunggulh louhna ding a hihte pen eite a ding a etsakna ahih ding ahi,

⁷tualeh alak ua mi khenkhat milim biami ahihmah bang un milim biami hikei un. “Mipite pen neding leh dawn dingin atou ua, tualeh kimawl dingin ading jel uh,” chih gelh bang in.

⁸Alak ua mi khenkhatten nulehpa kal thanghuaina a bawljiak un, nikhat in sangsawmnih leh sangthum apuklup lawh bang un eiten huabang mohna i bawlkei ding uhi.

⁹Alak ua khenkhat in Toupa a ze-et ua gul a hihmang a aom bang un, enjaw Krist i ze-et kei ding uhi.

¹⁰Tualeh alak ua khenkhat aphun ua, hihmangpa hihmang a aom bang un iphunkei ding uhi.

¹¹Tuin hihte jousiah etsakna dingin atung uah ana tung hi, tualeh ei leitung huntawp hung tunnate kiangah thuhilhna ding a gelh ahi.

¹²Tuajiakin, ading a kingaihtuahte pilvang hen, atuachih keileh apuk ding hi.

¹³Mihing thuakval natung uah khemna atung ngai kei, hinanleh Pasian a gin-om a, aman na thuakzoh val uh khemna natuah ding uh aphalkei ding, hinanleh nathuak zohna ding un khemna jousiah a na taikhiat theihnang lampi ahung bawlsak jaw ding hi.

¹⁴Tuajiakin, ittakte aw, milim biak taisan un.

¹⁵Mipilte bangin thu ka gen ahi, ka thugen ngaihtuah un.

¹⁶Gualjawlna nou a gual kajawl uh, Krist sisan kipawlkhawm pihna hilou amaw leh: Tanghou kabal kek uh Krist pumpi kipawlkhawm pihna hilou amaw leh?

¹⁷Ajiak eite tampi hinanlei zong, tanghou beukhat, pumpi khat ihi uhi.

¹⁸Taksa dan ah Israelte en sin ua, kithoihna sa nete, maitam tawh tan neikhawm hilou ahi uai le.

¹⁹Ahihleh bang ahia ka gen ding? Milim pen sil banghiam khat ahi a, ahihkeileh milim biakna a sil kilante zong sil banghiam khat ahi chi ka hiai le?

²⁰Jentelte kithoihna pen Pasian kiang a kithoihna hilou in, dawite kiangah akithoih uh chi ka hijaw hi. Nou dawite tawh na kipawlkhawm uh kung deihsak kei hi.

²¹Toupa nou leh dawi nou na dawnkhawm thei kei ding uh, Toupa dohkan ah leh dawite dohkan ah na nekhawm thei kei ding uhi.

²²Ahihkeileh Toupa thangsia ding a hantawk sawm ihi uai leh? Eite amah sang a hatjaw ihi uh hiam?

²³“Sil jousiah kei dingin asiang a,” hinanleh sil jousiah kei dingin ahoih kim kei hi. Sil jousiah kei dingin asiang a, hinanleh sil jousiahin mi a bawlhoih kei hi.

²⁴Mi kuamah in amah guak hoihna ding zongjaw louin, midangte hoihna ding zongjaw hen.

²⁵Sa ajuakna mun a kijuak taphot sialehpha theihna jiakin bangmah dongse louin ne un.

²⁶Ajiak, “Leitung leh asung a om jousiah Toupa a ahi hi.”

²⁷Ginglou mite lak a kua hiam in an neding a ahung chial a, tualeh pai na ut leh namai a kilui taphot sia leh pha theihna jiakin bangmah dongse louin ne in.

²⁸Hinanleh mi kuahiam in, “Hih pen milim kiang a kithoina ahi,” chia ahung hilh leh amah ahung hilhpa jiak leh sia leh pha theihna jiakin nekei un, ajiak leitung leh asung a om jousiah Toupa a ahi hi.

²⁹Nang mah sia leh pha theihna chi ka hikei a. Hinanleh midangte sia leh pha theihna chi ka hijaw hi. “Achihleh bang ding a midangte sia leh pha theihna in ka zalenna thunun ahia?

³⁰Hinanleh kipak tak a ka nek leh bangding a kipahthu ka genna tung a gensiat a om ka hia?”

³¹Tuajiakin, nane un zong nadawn un zong nabawl taphot uh Pasian thupina ding ngen in bawl un.

³²Judate hiam, Jentelte hiam ahihkeileh Pasian saptuamte hitaleh a thangpaihna ding un bawl kei un.

³³Keimah phattuamna ding zonglou a, hinanleh hundam a a omtheihna ding ua mi tampite phattuamna ding a, sil jousiah a michin teng ka kipaksak mahbang in.