Read Thangal Naga 1 KORINTE 11 Bible Online

1 KORINTE 11 - Thangal Naga bible

1 KORINTE 11

¹Kei Krist omdan latu ka hih mahbang in nou kei omdan latu hi un.

²Tualeh unaute aw, sil bangkim a nungtheih ua, dante kunghilh bang jel a nakep jing jiak un kung pahtawi hi.

³Hinanleh pasal jousiah lutang Krist ahi, numei lutang pasal ahi, tualeh Krist lutang Pasian ahi chih natheih uh kung deih hi.

⁴Pasal kuapeuh alu khuhsa a thumna nei, ahihkeileh thugen jousiahin alutang a zahbawllou ahi hi.

⁵Hinanleh numei alu khuhlou a thumna nei hiam ahihkeileh thugen hiam jousiahin alutang a zahbawllou ahi hi. Ajiak huachibang a bawlte pen asam kiheu tawh kibang ahi.

⁶Ajiak numei in alu akhuh kei ding leh asam heukiau hen, hinanleh numei ding a sam heu hiam ahihkeileh heukiau ajumhuai leh kikhuh hen.

⁷Pasal pen Pasian lim bang leh a thupina ahihjiak in alu akhuhlouh ding mawng ahi, hinanleh numei ahihleh pasal thupina ahi;

⁸ajiak pasal pen numei a pat a siam ahikei a, hinanleh numei pen pasal a pat siam ahijaw hi.

⁹Pasal pen numei a ding a siam zong ahikei a, hinanleh numei pen pasal a ding a siam ahijaw hi.

¹⁰Hih jiakin numei in pasal thuneihna chiamtehna in leh, vantungmite jiakin alu akhuh ding ahi.

¹¹Hitalehzong Toupa silgel dan ah pasal lou in numei a omthei kei a, numei louin pasal a omthei kei hi.

¹²Ajiak numei pen pasal a pat siam ahihmah bangin pasal zong numei jiak a piang ahi. Hinanleh sil jousiah Pasian a kipan ahi.

¹³Noumah kingaihtuah un, numei in alu khuhlou a Pasian kiang a thumna aneih akilawm ei.

¹⁴Pasal in samsau aneih leh amah a dingin ajumhuai hi, chih ngaina dan in zong nou hung theisak hilou amaw,

¹⁵hinanleh numeiin samsau aneihleh amah a dingin athupina ahijaw hi, ajiak asam pen akhuhna ding a piak ahi.

¹⁶Hinanleh mi kuahiam a selkhahleh huachibang tawndan inei kei uhi, Pasian saptuam pawlten zong anei kei uhi.

¹⁷Ahihhang in nou hihthu kung hilhna ah kung phatthei kei hi, hoihjawksem nang a kikhawm hilou in, hinanleh siatjawksem nang a na kikhopjel jiak un.

¹⁸Ajiak amasapen a saptuam a na kikhop chiang un nalak uah kilang khenna a om nak chih kaja hi, tualeh ging zong ka gingta hi.

¹⁹Ajiak ataktak a kipomte akilat theihna dingin nalak uah ki langkhenna aom ding mawng ahi.

²⁰Tuajiakin, munkhat a nung paikhawm chiang un Toupa nitak an nektheihna gual ahi kei hi.

²¹Ajiak nanek chiang un michih midangte masang in noumau nitak an na kinek chiat uh, tuachi`n khenkhat agilkial a, adang in akham uhi.

²²Bang chidan ahia? Nekna ding leh dawnna ding inn kineihlou nahi uh maw? Ahihkeileh Pasian saptuamte na simmoh un, bangmah neiloute na zahlaksak uh maw? Na kiang uah bang ahia ka gen ding? Kung phat ding a diam? Hih thute ah kung phat kei ding hi!

²³Ajiak Toupa kiang a ka muh pen nou kung hilhsawn ahi, tuachia Toupa Jesu`n matsak a aom ding jan in tanghou ala a,

²⁴tualeh kipahthu agenzoh in, abalkek a, la unla, ne un, “Hih kataksa nou a ding a kipia pen ahi, nung theihjingna ding un hih bawljel un,” achih.

²⁵Tuachimah bangin, nitak an anek zoh in nou ala a, “Hih nou ka sisan a thukhunthak ahi, na dawn teng un keimah nung theihjingna ding un hih bawljel un,” achih.

²⁶Ajiak hih tanghou nanek ua, hih nou nadawn teng un a hungpai kik masiah Toupa sihna naphuangjak uh ahi hi.

²⁷Tuajiakin kuapeuh chinloupi a hih Toupa tanghou ne a anou dawn tuh Toupa taksa leh sisan tung ah siamlouh atang ding hi.

²⁸Hinanleh mi amah ki enchianjaw hen, tuachi`n tanghou ne henla nou dawn hen.

²⁹Ajiak Toupa taksa in a etsak theiloupi a, kuapeuh netakloupi a ne leh dawntakloupi a dawn in amah siamlouh kitanna dingin ane in adawn ahi.

³⁰Hihjiakin nalak ua mi tampi na jawngkhal ua, na china ua, tualeh tampi na sihlohta uhi.

³¹Ajiak eimah leh eimah ki enchian lei vaihawmsak a omlou ding ihi uhi.

³²Hinanleh vaihawmsak a i om un zong leitung tawh siamlouh tang a i omlouhna ding un Toupa taihilh in i om uhi.

³³Tuajiakin, unaute aw, neding a na kikhop chiang un, khat leh khat ki ngakkhawm chiat un.

³⁴Hinanleh na kikhopna uh vaihawmna na thuaklohna uh ahihlouh nang in mi kuapeuh agil akial leh a inn ah ne hen, tualeh thudangte pen kung paichiang in kalem siang na ding hi.