Read Thangal Naga 1 KORINTE 15 Bible Online

1 KORINTE 15 - Thangal Naga bible

1 KORINTE 15

¹Huate lou zong unaute aw, na kiang ua ka tangthupha gen, pom zong napom uh, tualeh huamah a nadinna uh kung theisak kik hi.

²Na kiang ua ka thugen na pomdet uleh huamah ah hundam in na om ding ua, atuachih keileh, na ginna uh mokna asuak ding hi.

³Ajiak amasapen in ken zong ka muh pen nou kung hilhsawn hi, chih Pasian laisiangthou dungjui in Krist in ikhialhnate jiakin asi a;

⁴tualeh vuiin a om a, Laisiangthou dunguiin nithumni in athoukikta hi.

⁵Tualeh Kifa kiangah akilak a, tuazoh in sawm leh nihte kiang ah.

⁶Tuanung in unau ja nga sang a tamjaw kiangah khatvei thu in a kilak a, alak ua tamjawte tutan in adam nalai ua, hinanleh khenkhatte a ihmuta uhi.

⁷Tuanung in Jakob kiangah a kilak a, tuachi`n sawltakte tengteng kiang ah.

⁸Tuachi`n a nunung pen in ahunlou bang a piang kei kiangah a kilak hi.

⁹Ajiak sawltakte lak a neupen ka hi a, saptuamte ka bawl gentheih jiakin sawltak chihtak zong ka hikei hi.

¹⁰Hinanleh Pasian hehpihna jiakin ka hihhih ding ka hita hi, tualeh ahehpihna hung piak athawn in a omkei a, hinanleh amauhte teng sang in ka semgim jaw hi, hinanleh kei sep hilou in Pasian hehpihna ka kiang a om in asemjaw hi.

¹¹Tuajiakin, kei hi in, amauh hitaleh, tuachi`n ka gen ua, tuachi`n nou na gingta uhi.

¹²Tuin Krist misi lak a pat athoukik chih igen ngal leh bangchidan a nalak ua khenkhat in misi thohkikna a omkei chi na hi ua?

¹³Atuachihleh misite thohkikna a om keileh Krist zong a thoukik kei ding hi;

¹⁴tualeh Krist a thohkik keileh ka thugen uh zong athawn ahi ding a, na ginna uh zong athawn ahi ding hi.

¹⁵Ahi, Pasian in Krist akaithou hi chia, Pasian theihpihtu hi a thu ka gen jiak un, kou Pasian theihpihtu diklou bangin ka omta uhi, hinanleh misi thohkikna omlou takpi ahihleh, amah zong a kaithou kei ding hi.

¹⁶Ajiak misite athohkik kei uleh Krist zong kaihthoh in a omkei ding hi.

¹⁷Tualeh Krist kaithoh a aom kei leh, na ginna uh zong athawn ahi ding a, na khialhna uah na om nalai ding uhi.

¹⁸Tuachi`n Krist a ihmute zong a mangthang ahita ding uhi.

¹⁹Tu damsung guak a ding a Krist a kinepna ineih uleh, mi tengteng lak a mi hehpihhuai pen ihi ding uhi.

²⁰Hinanleh tuin Krist pen misi lak a pat kaihthoh in a omta a, ihmute lak a gah masapen a hunghita hi.

²¹Mihing khat jiak a sihna ahung om jiakin, mihing khat jiak mah in misi thohkikna zong ahung om hi.

²²Ajiak, Adam a mi tengteng asih mahbang un, Krist ah mi tengteng suk hing in aom ding uhi.

²³Hinanleh michih amauh hun chiat ah, Krist gah masapen ahi a, tuazoh chiangin ahung paikikna ah Krist ate ahi ding hi.

²⁴Tuachi`n atawp a hungtung ding, huahun chiangin vaihawmna jousiah leh thuneihna jousiah leh silbawltheihna jousiah sumang in Pasian Pa kiang ah a kumpi gam a piata ding hi.

²⁵Ajiak a melmate jousiah akeng nuaia akoih masiah aman vai ahawm ding hi.

²⁶Melma nunung sukmang a om ding pen ahihleh sihna ahi.

²⁷Ajiak Pasian in sil jousiah akeng nuai ah akoihta hi. Hinanleh, sil jousiah a thunuai ah akoihta achih in, a thunuai a sil jousiah koihsakpa Pasian a huamkha kei, chih akilang hi.

²⁸Tualeh sil jousiah a thunuai a aom chiangin, Tapa ngei zong sil jousiah a thunuai a koihpa nuai ah a kituhlutta ding hi.

²⁹Atuachih keileh, misite a ding a baptisma atansak uh bangding ata diam? Misite thoukik mawng mawng lou ding ahih uleh, bangding a misite a ding a baptisma atansak uh ahia?

³⁰Tualeh bangding a eite zong dakkal teng a lau a omjing ihi ua?

³¹Jesu Krist i Toupa a kung suanna sial in niteng in ka si ahi!

³²Mihing tatdan bang a Ephesa a gamsate kihaupih ka hihleh kei dingin bang aphatuam dia, misi thoukik lou ahihleh? Ne in i dawn ding uh, jing chiang a si ding ihi.

³³Khem in om kei un, “Lawigilou in omdan hoih asusia veu hi.”

³⁴Diktatna lam ah halh unla, khial kei un, ajiak khenkhat in Pasian theihna a neikei uhi, hih na jumna ding ua ka gen ahi.

³⁵Hinanleh mi kuahiam in, “Misite bangchi`n kaihthoh ahi ding ua? Bangchi bang a pumpi nei in ahung pawt ding ua?” achi ding uhi.

³⁶Nang mimaw! Na khaichi tuh zong asih phot keileh apoukei hi.

³⁷Tualeh natuh in akung hung om ding natuh kei a, gehu hi`n khaichi tuamtuam hitaleh zong atang mah ahi natuh.

³⁸Hinanleh Pasian in khaichi jousiah kiangah pha asak bang jelin akung apia hi.

³⁹Taksa jousiah taksa kibang ahikei a, hinanleh mihing taksa atuam ahi a, gamsate taksa atuam a, ngasate taksa atuam a, tualeh vasate taksa atuam hi.

⁴⁰Vanlam pumpi zong a om a, leilam pumpi zong a om, hinanleh vanlam pumpi thupina atuam a, leilam pumpi thupina atuam hi.

⁴¹Ni in thupina tuam khat anei a, kha in thupina tuam anei, tualeh aksi leh aksi zong athupina uh atuamchiat hi.

⁴²Tuachimah bangin misi thohkikna zong ahi. Muatthei a tuh in a om a, muattheilou a kaihthoh in a om.

⁴³Thulimlou tak a tuh in a om a, thupitak a kaihthoh in a om hi, hatlou a tuh in a om a, sil bawltheitak a kaihthoh in a om hi.

⁴⁴Salam pumpi nei a tuh in a om a, khalam pumpi nei a kaihthoh in a om, salam pumpi a om a, khalam pumpi zong a om hi.

⁴⁵Tualeh, “Mi masa, Adam pen, hinna nei mihing a siam ahi hi”; chia gelh bang in, hinanleh Adam nunung pen ahihleh hinna piatu kha ahi hi.

⁴⁶Ahihhang in khalam a om masa kei a, salam a om masajaw hi, tuakhit in khalam ahung om hi.

⁴⁷Mihing masa leivui a siam, leimi ahi a, mihing nihna pen van a kipan Toupa ahi.

⁴⁸Lei a siam mite pen lei a kisiampa bang ahi ua, vanlam mite ahihleh van a mite bang ahi uhi.

⁴⁹Tualeh lei a kisiam mel ipuak bang un vanmi mel zong ipua ding uhi.

⁵⁰Tuin unaute aw, taksa leh sisan in Pasian gam aluah thei kei a, muatthei in zong muattheih louhna aluahthei kei, chih ka gen ahi.

⁵¹Ngai un, thugu`k kung hilh ding hi, i un un i ihmu khin kei ding ua, hinanleh i un un hihlamdang in i omsiang ding uhi.

⁵²Thakhat in, mitphiatkal louin, pengkul nunung pen dingin, pengkul ahung ging ding a, tualeh misite pen muattheilou a kaihthoh in a om ding ua, eite zong hihlam dangin a i om ta ding uhi.

⁵³Ajiak hih muatthei in muattheih louhna asilh ding a, tualeh sithei in sihtheih louhna asilh ding hi.

⁵⁴Tuachia hih muatthei in muattheih louhna asilh a, tualeh hih sithei in sihtheih louhna asilh hun chiangin, zohna in sihna a valhjouta, chia kigelh ahung tangtung ta ding hi.

⁵⁵“Aw sihna, nagu khoiah, om ta? Aw hankhuk, nazohna, khoiah omta?”

⁵⁶Sihna gu lah khialhna ahi ngal a, tualeh khialhna thuneihna dan ahi.

⁵⁷Hinanleh i Toupa Jesu Krist jiak a gualzohna hung piapa Pasian kiang ah kipahthu om hen.

⁵⁸Tuajiakin, ka ittak unaute aw, dettak in, hihling guallouh in, Toupa nasep kuhkaltak in sem gige in om un, nasep gimna uh Toupa ah athawn kei ding chih nathei uhi.