Read Thangal Naga 1 KORINTE 16 Bible Online

1 KORINTE 16 - Thangal Naga bible

1 KORINTE 16

¹Tuin, misiangthoute a ding thohlawm thu pen, Galatia gam a saptuamte thu kapiak bang in nou zong bawl un.

²Kungpai chiang a thohlawm donna aom nawnlouhna ding in, ni sagihni nimasa pen in Pasian in agualjawl bang jel in michih in na koihkholh chiat un.

³Tualeh kungpai chiangin, pha nasak penpen uh, na itna silpiak uh vapia dingin na laikhak utawh Jerusalem ah kasawl ding hi.

⁴Hinanleh kei zong kapai aphatmoh leh, keitoh jawk in apai ding hi.

⁵Mesidonia gam totsuak sawm ka hihman in, Mesidonia gam ka totsuak khit chiangin na kiang uah kungpai ding hi.

⁶Tualeh kapai nang khat peuh a nou nung khak theihna ding un na kiang uah tomkhat, ahihkeileh phalbi sungteng katam maithei hi.

⁷Ajiak jinkawm a lampi a hung muh malam ka utkei a, hinanleh Toupa`n lem asak leh na kiang ua sawtdeuh tam ka kinem hi.

⁸Hinanleh pentikos dongin Ephesa khua ah katam ding hi.

⁹Ajiak kot lianpi leh phatuamtak kei dingin aki hong a, doudaltu zong tampi a om uhi.

¹⁰Tualeh Timothi a hungpai leh laulou a na kiang ua a omtheih nang ngaihtuah un, ajiak kei bangin aman zong Toupa nna asem hi.

¹¹Tuajiakin, kuaman simmoh kei uhen, hinanleh ka kiang a ahung paitheih nang in hoihtak in khajaw un, ajiak unaute tawh ka kiang a a hungpai uh ka kinem hi.

¹²Unaupa Apollo thu ahihleh unaute tawh na kiang ua hungpai dingin ka ngen a, hinanleh tu leh tu a hungpai ding a utkei a, hinanleh hun lemtang aneih chiangin ahung pai ding hi.

¹³Kiveng unla, ginna ah dingkip un, hangsan unla, hattak in om un.

¹⁴Na silbawl jousiah uh itna a bawl hihen.

¹⁵Unaute aw, Stephena leh a innkuan pihte Akhaia gam a Pasian thu a gah masa pen ahi ua, misiangthoute nna sepsak dingin akipia uh chih nathei uhi,

¹⁶huachibangte kiangah leh michih koutawh hua nna semgimte kiangah ki tuhlut ding in kung ngen hi.

¹⁷Stephena leh Forchunata leh Akhaika ahung pai uh ka kipak hi, ajiak nou omlouh awng ahu uhi.

¹⁸Ajiak amau`n nou leh kei kha ahung hihhalhsak uhi. Tuajiakin huachibang mite theisiam un.

¹⁹Asia gam a saptuamte`n chibai a hungbuk uhi, Prisila leh Akuila in a inn ua saptuam kikhawmte tawh Toupa ah chibai hoihtak a hungbuk uhi.

²⁰Unaute jousiahin chibai a hungbuk uhi. Kitawp siangthou in khat leh khat chibai kibuk tuah un.

²¹Keimah Paul in keima khut ngei a chibai kung bukna ahi.

²²Mi kuapeuh in Toupa Jesu a it kei leh hamsia thuak in om hen! (anathema) I Toupa, hung pai! (Maran-atha)

²³I Toupa hehpihna na kiang uah om hen.

²⁴Krist Jesu a kung itna na kiang uah om hen. Amen.