Read Thangal Naga 1 KORINTE 2 Bible Online

1 KORINTE 2 - Thangal Naga bible

1 KORINTE 2

¹Tualeh unaute aw, kei na kiang ua Pasian thugu`k gen a kung pailai in thugen siam mahmah leh pilna thupitak tawh hungpai ka hikei hi.

²Ajiak ken, Jesu Krist leh amah kilhden a aom thu chih louh nalak uah bangmah dang theih ka sawm kei hi.

³Tualeh kei hatlou leh lau leh li`ng kawm in nalak uah ka om a,

⁴ka kam suakte leh ka thugente mihing pilna gensiam thu ahi kei a, hinanleh kha leh asil bawltheihna a hihhat in ahijaw hi.

⁵Tuachia na ginna uh mihing pilna a ki-nga hijaw louin, Pasian silbawl theihna a ki-nga ahihjawkna ding ahi hi.

⁶Hinanleh pichingte lak ah pilna thu zong ka gen jel uhi, ahihhang in hih khang hun pilna thu ahi kei a, hih khang hun vaihawmtu mangthang dingte pilna thu zong ahi kei hi.

⁷Hinanleh kouten Pasian pilna thugu`k i thupina ding a Pasian in leitung om masang a aguatsa pilna kiphual thu ka gen jaw jel uhi.

⁸Huapen hih leitung vaihawmtute in a theikei uh, ajiak nathei hitale uh thupina Toupa pen ana kilhden kei ding uhi.

⁹Hinanleh Laisiangthou a, “Mit a muh ngailouh, bil a jak ngailouh, tualeh mihing lungtang a zong lut ngailou, Pasian in amah itte ding a abawlsak silte pen,” chia gelh bang in.

¹⁰Hinanleh Pasian in huate pen ikiang uah ahung theisakta hi, ajiak kha in bangkim azongkhia a, ahi, Pasian thugilte zong.

¹¹Mihing thute mihing a om kha loungal in kua ahia athei ding? Tuachimah bangin Pasian thute zong Pasian kha loungal kuamah in a theikei hi.

¹²Tuachi`n Pasian in athawn a a hungpiak silte i theihtheihna dingin, eite in leitung kha hilou in, Pasian a kipan kha pen itang uhi.

¹³Hua silte pen mihing pilna thuhilhna a genlou in, Khasiangthou thuhilh pen genjaw in, khalam thute khamite kiang a hilhchian in i genjaw uhi.

¹⁴Hinanleh leitungmite in pen khalam thute a sangthei kei uhi, ajiak amauh ngaih in huate pen mothuai ahi a, kha a theih ahihjiak in thei zong a theithei kei uhi.

¹⁵Hinanleh khamite in pen sil jousiah atheichian jel ua, amah ahihleh kuaman atheichian kei hi.

¹⁶Ajiak Laisiangthou in, “Amah thuhilh thei ding a, kuan ahia Toupa lungsim thei khin?” hinanleh eite`n Krist lungsim ipua uhi, achi hi.