Read Thangal Naga 1 KORINTE 4 Bible Online

1 KORINTE 4 - Thangal Naga bible

1 KORINTE 4

¹Tuachi`n mi`n kou pen Krist sawltakte leh Pasian thugu`k enkawltute bangin hungthei uhen.

²Hih ah enkawltu hihna ah pen mi gin-om hih apoimoh hi.

³Hinanleh nou, nung ze-et ua, mihing ngaihtuahna a nung ze-et uh pen kei a dingin sil neunou khat ahi, keimah leh keimah ngei zong kaki ze-et kei hi.

⁴Ajiak keiman bang mah kimawhsakna ding ka theikei hi. Hinanleh ahung enkhiatu Toupa ahi hi.

⁵Tuajiakin ahunma in, Toupa ahung paima in bangmah ze-et kei un. Aman mial a sil kiphualte vak ah ahung puakhia ding a, tualeh lungtang a ngaihtuahte zong ahung kilang ding hi, tuachiang in michih in Pasian phatna atangchiat ding uhi.

⁶Tualeh unaute aw, “Akigelh bang val a kuamah ngaihtuah louh ding chih kou a pat na jiltheihna ding uleh,” nalak ua kuamah in khat suang a khat tung a ki uangsak a na om louhna ding un, hih thute nou jiakin kei leh Apollo etsakna in ka kipia uhi.

⁷Ajiak kuan ahia nang midang a pat ahung tuamsak? Tualeh ahung kipialou bang ahia naneih? Tualeh mi piak nei nahihleh, bangding a akipialou bang a kisathei na hia?

⁸Tuin navahta ua, tuin na hausata uh, kou panglou in kumpipate bangin vai nahawmta uh, kou zong noutawh vai ka hawmtheihna ding un a taktak a vaihawm hile uchin ka ut hi.

⁹Pasian in kou sawltakte pen siding a mohpaih mite bangin a nunung pen a ahung koih hi in ka ngaihtuah hi. Tuajiakin leitung leh, vantungmite leh, mihingte mitmuh a etnop a bawl in ka om uhi.

¹⁰Koupen Krist jiakin mimaw ka hi ua; hinanleh noupen Krist a mipil na hi uhi! Koupen ka hat kei ua, hinanleh noupen na hat uhi! Noupen na zah-om ua, koupen simmawh in ka om uhi!

¹¹Tu hun mahmah in zong kagil kial un ka dangtak ua, saguak in ka om ua; vuak in ka om ua; inn beiin ka om uhi;

¹²tualeh kakhut ua nna semgim in kagim mahmah ua; housiat a ka om un ka gualjawl ua, vuak a ka om un ka thuak teitei uhi;

¹³gensiat a ka om un, kajawl lungdam ua, minsiatsak a ka om un zong ka ngen ngutngut ua, tunitan in zong leitung silnin, silnin jousiah bang a bawlin ka om uhi!

¹⁴Na jumna ding un hihthute kagelh ahi kei a, hinanleh kata deihtakte bangin kung taihilh ahijaw hi.

¹⁵Ajiak nou Krist ah hilhtu sangsawm nei nanle uchin pa tampi na neikei uhi.

¹⁶Tuajiakin ka omdan juitute hiding in kung ngen hi.

¹⁷Hih ding jiakin Toupa a ka tapa deihtak leh gin-om Timothi na kiang uah kung sawl hi, aman pen gamchin a saptuamte ka hilhjel bangin, Krist a ka omdante nou ahung theikhiasak kik ding hi.

¹⁸Na kiang ua hung painawnlou ding bangin khenkhat na ki uangsak uhi.

¹⁹Hinanleh Toupa`n lem asak leh kung paibaih ding hi, tuachi`n ki uangsakte pen a thugen uh hilouin, hinanleh a silbawl theihna uh ka theita ding hi.

²⁰Ajiak Pasian gam pen thu ah a om kei a, silbawl theihna ah a omjaw hi.

²¹Bang ahia nadeih uh? Na kiang uah chiang tawiin kung pai diam? Ahihkeileh itna leh lungnemna kha tawh kung pai diam?