Read Thangal Naga 1 KORINTE 5 Bible Online

1 KORINTE 5 - Thangal Naga bible

1 KORINTE 5

¹Na lak uah kingaih a om chih thuthang a om hi, tuachibang kingaih Jentelte lak a zong om ngailou, mikhat in apa zi akitenpih chih!

²Tualeh huachibang sil bawlpa pen nalak ua pat nohkhiat ding a lunggel naneihtak sang un, naki uangsakpih jawsop uhi.

³Ajiak keimah taksa a ka omlouh hangin, ka kha in kung om a, huachibang a gamtapa pen nalak ua om bangin atung thu vai kahawm khinta hi.

⁴I Toupa Jesu Krist min in, ka kha leh I Toupa Jesu Krist sil bawltheihna tawh na kikhop khawm chiang un na kiang uah a om hi,

⁵tuachibang mi pen I Toupa Jesu ni chiang a akha hundam a a omtheihna dingin, ataksa sukmangna dingin setan kiangah piakding ka chi ahi.

⁶Na kisaktheihna uh ahoih kei hi! “Tol themnoukhat in tanghou beu apum in ajelsuak jel chih theilou na hi uh maw.”

⁷Tuajiakin tol sohlouh nahih mahbang un, tanghou beuthak na hihtheihna ding un tol luipen paisiang un, ajiak i paikan kut uh Krist pen goh in a omta hi.

⁸Tuajiakin ankuang luini, tol lui tawh hilou in, khansia leh gitlouhna tol soh tawh hilou in, hinanleh gin-omna leh thutak tanghou tol sohlouh tawh iluijaw ding uhi.

⁹Ka laikhak ah kingaihhatte ki thuahpih lou dingin kung gelh hi.

¹⁰Hih leitung kingaihhat mite tawh hiam, huaiham mite tawh hiam, lepgute tawh hiam, ahihkeileh milim biate tawh hiam kithuahpih mawng mawng louh ding chi ka hikei a, ajiak huachi ding hileh hih leitung a pat na pawtkhiat uh angai ding hi.

¹¹Hinanleh tuin kuapeuh unau chih hingal a, kingaihhat hiam, ahihkeileh huaiham hiam, ahihkeileh milim bia hiam, ahihkeileh hangsan hiam, ahikeileh uain khamhat hiam, ahihkeileh lepguk-hat hiam, ahihleh kithuahpih louh dingin na kiang uah kung gelh ahi. Huachibang mi tawh nezong nekhawm lou ding in.

¹²Ajiak pualam mite ken ka ngaihkhok nang bang aom ei? Asung a omte hilou maw nou nangaihtuah jel uh.

¹³Hinanleh pualam a mite Pasian in angaihtuah jel hi. “Tuajiakin nalak ua pat in hua migiloupa notkhia un.”