Read Thangal Naga 1 KORINTE 6 Bible Online

1 KORINTE 6 - Thangal Naga bible

1 KORINTE 6

¹Na lak uah kuapeuh in thubuai neile uchin, misiangthoute mai a tutlou in midiktatloute maiah na tutngam ding uai le?

²Misiangthoute`n leitung vaihawm ding ahi uh chih theilou na hi umaw? Ahoih, tuachia, leitung vai hawmding nahih uleh, sil neupente vaihawm ding a chinlou na hi umaw?

³Vantungmite vaihawm ding ihi uh chih theilou na hi uh maw? Tuachi ahihleh hih damsung silte ivaihawm talua tham ding uhi!

⁴Tuachi ahihleh hih damsung silte vaihawm ding naneih un, saptuamte lak a mi simmoh huaipente natousak uai le?

⁵Na jumna ding un hih ka gen ahi, nalak uah mipil khatbek omlou na hi omaw le.

⁶Hinanleh unau in unau dang khat nahek ua, huazong gingloumi maiah ahi nalai hi!

⁷Tuajiakin khat leh khat na kihektuah uh pen nakhialhna lianpi uh ahi. Bangding a kimohsak jawlou na hi ua? Bangding a khem a om jawmai lou na hi ua?

⁸Hilou, noumah in na bawlkhial ua, nakhem uh, huazong na unaute tung ah ahi nabawl uh!

⁹Mi diktatloute`n Pasian gam aluah kei ding chih theilou na hi uh maw? Khem in om kei un, kingaihhatte hiam, milim biate hiam, angkawmte hiam, mihukte hiam, tawkuahukte hiam

¹⁰gutate hiam, huaihamte hiam, uain khamhatte hiam, mi housiathatte hiam ahihkeileh lepgute hiam in Pasian gam aluah kei ding hi.

¹¹Tualeh nalak ua khenkhat huachibang nana hi uh, hinanleh I Toupa Jesu min leh Pasian kha a sopsiangthou na hita uh, siamtansak na hita uhi.

¹²“Sil jousiah bawl kei dingin asiang a,” hinanleh sil jousiah bawl ahoihkim kei hi, sil jousiah bawl kei dingin asiang a, hinanleh bangmah silbawltheihna nuai ah ka omkei ding hi.

¹³“Ante pen gilpi a ding ahi a, tualeh gilte pen ante a ding ahi,” hinanleh anih in Pasian in a hihmang ding hi. Tualeh pumpi pen kingaihna ding ahikei a, hinanleh Toupa a ding ahijaw hi, tualeh Toupa pen pumpi a ding ahijaw hi.

¹⁴Pasian in Toupa akaithou a, tualeh eite zong a silbawl theihna in ahung kaithou ding hi.

¹⁵Na pumpi uh Krist hiangte ahi chih theilou na hi umaw? Ahihtakleh Krist hiangte la in kijuakte hiang in ka bawl ding adiam le? Bawl deksuai lou e!

¹⁶Ahihtakleh kijuakte tawh kizop peuhmah pen pumkhat ahi uh chih theilou na hi umaw? Ajiak aman, “Anih un pumkhat ahita ding uh ahi,” achi hi.

¹⁷Hinanleh Toupa tawh kizopte pen kha ah amah tawh pumkhat ahi uhi.

¹⁸Kingaih taisan un, mihing khialhna jousiah pen pumpi pualam ahi; hinanleh kuapeuh angkawmna khialhna bawl in tuh ama pumpi tung ah sil a bawlkhial hi.

¹⁹Ahihtakleh, na pumpi uh na sung ua om, Pasian a pan a namuh uh, Khasiangthou tempul ahi a, nou mauh a na hikei uh chih theilou na hi uh hiam?

²⁰Ajiak man a lei nahi uhi, tuajiakin na pumpi uh leh na kha un Pasian pahtawi un, huate pen Pasian a ahi.