Read Thangal Naga 1 KORINTE 9 Bible Online

1 KORINTE 9 - Thangal Naga bible

1 KORINTE 9

¹Sawltak hilou ka hi maw leh? Zalenlou ka hi maw leh? I Toupa Jesu mulou ka hi maw leh? Nou Toupa a ka nasep hilou nahi uh maw leh?

²Midangte a dingin sawltak hikei mahleng zong, nou a dingin ginmoh omlou takin ka hi ahi, ajiak Toupa a ka sawltak hihna chiamtehna noumah nahi uhi.

³Kei hung ze-ettute kiang a ka dawnna hih ahi:

⁴Nek nang leh dawn nang ah thu neilou ka hi hiam?

⁵Sawltak dangte leh, Toupa a unaute leh, Kifa bang a unaunu khat kizohpih a, zi a neitheilou ka hi uh hiam?

⁶Ahihkeileh nna seplouhna dingin keileh Barnaba in thu neilou ka hi uh hiam?

⁷Galkapte kua ahia aneihsa seng a galkap a kuanngai? Grep huan bawlngal a agah nelou kua aom ei? Ahihkeileh ganhon khawingal a anawi nelou kua aom ei?

⁸Hih thute mihing ngaihdan guak a gen ka hi hiam? Ahihkeileh danthu in zong huamah genlou amaw?

⁹Ajiak Mosi danbu ah, “Bawngtal in buh achillai in amuk kanken,” chih gelh ahi. Pasian in bawngtalte ding guak ngaihtuah adiai le?

¹⁰Ahihkeileh aman eite ding jiak mah a agen adiai le? Eite ding jiak a agelh ahi talua hi. Loukaipa`n kinemtak a akaih ding ahi a, tualeh kinemtak a buh veltu in zong akinepna amuh ding ahi.

¹¹Kou nou a ding a khalam silte tuh ka hih uleh, na taksa lam silte uh at le ung sil thupi ahi diai le?

¹²Midangte`n natung ua hih thuneihna tang ahih uleh, kou zong tangsem jawlou ding ka hi uh maw? Hitalehzong hih thuneihna ka zong kei uhi, Krist tangthupha kadal louhna ding un bangkim ka thuakjaw uhi.

¹³Sil siangthou a biakna nasemten tempul a silte ane uh, tualeh maitam a nasemte`n maitam sillatte ah tan anei uh chih theilou na hi uh hiam?

¹⁴Tuachimah bang a tangthupha gentute pen tangthupha mah a ahin ding uh ahi chi`n Toupa`n thu apia hi.

¹⁵Hinanleh ken hih silte khatbek ka zangkei hi, tualeh hih silte ka tungah kibawl leh zong ka chikei hi. Ajiak kuahiam in ka kisuanna pen bangmah lou a abawl sang in kei dingin sih ahoihjaw hi!

¹⁶Ajiak tangthupha gen nanleng zong suan ding bangmah ka neikei hi. Bawllouh theihlouh katung a ki-nga ahihjiak in, tangthupha gen keileng katung agik ding hi!

¹⁷Ajiak hih sil uttak a bawl ka hihleh nuamman muh ding kanei hi, hinanleh ka utthu lou a bawl ka hihleh tangthupha kepna ka khut a piak ka hi ding hi.

¹⁸Tualeh ka nuamman bang ahia le? Tangthupha ka gen chiang a tangthupha a ka thuneihna aval a ka zaklouhna ding a Krist tangthupha athawn a pia ka hihtheihna pen ahi.

¹⁹Mijousiah a pat zalen himah nanleng, mi tamsem kalak theihna dingin mijousiah sila in ka kibawl hi.

²⁰Judate ka laktheihna dingin Judate kiangah Judami bangin ka om a, dan nuai a omte ka laklut theihna dingin, dan nuai a omte kiangah dan nuaia om bangin ka om hi, dannuai a omlou hinan leng zong.

²¹Dan neiloute ka laklut theihna dingin, dan neiloute kiangah dan neilou bangin ka om hi, hinanleh Pasian dan nuaia omlou hituanlou in, Krist dan nuai a omjaw in.

²²Mi hatloute ka laklut theihna dingin, mi hatloute kiangah mi hatlou bangin ka om hi, bang chidan hiam a mi khenkhat bek ka hundam theih nangin mijousiah kiangah sil bangkim in ka kibawl hi.

²³Noutawh hih ah tan ka neihtheihna dingin tangthupha jiakin hih ka bawl hi.

²⁴Kitaidemte aun un atai ua, hinanleh khat guakin nuamman a mujel uhi chih theilou nahi uh hiam? Na gahtheihna ding un tuachimah bangin tai un.

²⁵Tualeh kuapeuh lohman muhsawm a kidemna a pangmi in sil jousiah ah a kithunun uhi. Amau`n lallukhu sethei muhna ding a bawl ahi ua, hinanleh en lallukhu setheilou dingin i bawl uh ahi.

²⁶Tuajiakin, huachibang in katai a, ajiakbei hilou in. Huihkhua a leltak tumte bang hilou in kapang hi.

²⁷Hinanleh ka pumpi ka thunun a, ka thunuai ah ka koih hi, atuachih keileh midangte kiang a tangthupha ka genzoh nungin keimahpi chinglah in ka om kha ding hi.