Read Thangal Naga 2 KORINTE 10 Bible Online

2 KORINTE 10 - Thangal Naga bible

2 KORINTE 10

¹Tuin nalak ua ki ngiamkhiat tak a om a, na omlouh ua noulam a hahkat keimah Paul in, Krist hoihna leh nunnemna in kung ngen hi.

²Hinanleh taksa lam a om hi a kou hung ngaihtuah khenkhatte tung a gumtat ding ahi chia ka ngaihtuah pen, huachi a ka gumtat louhna dingin kung ngen hi.

³Ajiak taksa in om nanle ung zong taksa dou in kadou kei uhi.

⁴Ajiak pen ka galdouna uh galvan pen taksa ahi kei a, kulhpi dettak hihchipna ding a Pasian jal a sil bawltheihna pen ahijaw hi.

⁵Suangtuahnate leh Pasian theihna kalh a thupitak a kibawl silsang chintengte paikhia in, ngaihtuahna chinteng Krist thumanna nuaia pui in.

⁶Tualeh na thumanna uh hih bukim ahih chiang a, thumanglou jousiah phuba lading a kimansa a om in.

⁷Nou sil apualam a kilatdan a en nahi uh maw leh? Mi kuapeuh in Krist-a hi-a amah leh amah akitheih a ahihleh, hihpen aman ngaihtuah kik hen, amah Krist a ahih bangin kou zong Krist a ka hi uhi.

⁸Ajiak, nou suksiatna ding hilou in, bawlhoih jawkna ding a Pasian hung piak ka thuneihna uh pen hahsuan in suang nanle ung zong ka jum kei ding uhi.

⁹Laikhak a nou hung hihlau sawm bang a ka kilatlouhna ding in.

¹⁰Ajiak amau`n, “Alaikhakte agik in, ahat a, hinanleh amun ah ataksa ajawngkhal a, a thugen zong ahawmthawh huai!” achi uhi.

¹¹Tuachibang mi in hih ngaihtuah hen, na kiang ua ka omlouh lai ua laikhak a ka om bang un, na kiang ua ka om chiang un zong sil bawl in ka om uhi.

¹²Ajiak kou pen amauh lak ah ka kisimtel ngam kei ua, ahihkeileh amauh tawh zong ka kitehkak ngam kei uhi. Hinanleh amauh pen amauh leh amauh kiteh in, amauh leh amauh kitehkak in lungsim neilou in a om uhi!

¹³Ahihhang in kou ka hih uleh pen kateh hunval un ka ki uangsak kei ding uhi, hinanleh Pasian hung hawmsak nou zong huap ding a tehna tuabang jel in ka uang jaw ding uhi.

¹⁴Thuneitu in nou kiang a ahihlet louh mah bangin, nou khupkhel in ka ki hihlian kei uhi, ajiak pen Krist tangthupha gen in noukiang tanpha in kungpai uhi.

¹⁵Ka tehna val uh sil, chih pen midangte sepsa a kisuang ka hi kei ua, hinanleh na ginna uh akhan chiangin leh, ka uapchiang bang jel un noujiak in nakpitak a hihlet in ka om ding uh chih ka kinem uhi.

¹⁶Tuachi`n nagam kal lam uh tanpha ah tangthupha gen dingin, tualeh ka khut ua ka bawlsa silte thu-a midangte bialsung a kisuanglou ding in.

¹⁷“Hinanleh akisuang taphot Toupa ah kisuang hen.”

¹⁸Ajiak amah kiphat pen pahtat in a om ngaikei a, Toupa`n aphat pen hihhoih ahijaw hi.