Read Thangal Naga 2 KORINTE 2 Bible Online

2 KORINTE 2 - Thangal Naga bible

2 KORINTE 2

¹Hinanleh tubansiah lungkham kawm a na kiang ua hung paikik nawnlou ding chih keimah thu in katum hi.

²Ajiak ken nou hung hih lungkham leng, ka hih lungkhamte chihlouh kuan ahia kei hung kipaksak ding?

³Tualeh na kiang uah hihthu mah ahi kung gelh, atuachih keileh kungpai chiang in ka kipakna dingte lak ah lungkhamna kamujaw kha ding hi, ka kipakna pen na un ua na kipakna uh hi dingin kung gintat jiak in.

⁴Ajiak pen buaina leh lungkhamna nasiatak a pat mittui tampi tawh kung gelh ahi, suk lungkham a na om louhna ding ua, hinanleh natung ua itna tamtak kanei hi chih na theihna ding un kagelh jaw hi.

⁵Hinanleh mi kuapeuh in lungkhamna abawl leh, keiguak ahung suk lungkham ahi kei a, (Ka hihtakluat louhna dingin na un un ahung hih lungkhamsak giap ahijaw hi.)

⁶Huachibang mi a dingin pen mi tamjawten apiak uh hih gawtna ahunta hi.

⁷Tuachi`n na ngaihdam ding ua, na khamuan jawk ding uh ahi, atuachih keileh huachibang mi pen alungkham sengseng na in avalhjou kha ding hi.

⁸Tuajiakin amah lam a na itna uh hihkip dingin kung ngen hi.

⁹Hihjiak mah in zong sil bangkim a thu na man uleh na manlouh uh theihna dingin ka gelh ahi.

¹⁰Sil khatpeuh a mi na ngaihdam uh tuh ken zong ka ngaihdam hi, ajiak sil khatpeuh a ka ngaihdam leh, hih ka ngaihdamna mi pen noujiak in Krist ah ka ngaidamta hi.

¹¹Atuachih keileh setan in ei ah hun lemtang amukha ding, ajiak a lungtupte i manghilh kei uhi.

¹²Tuaban ah Troas khua a Krist tangthupha gending a kung pailai in Pasian in kei a dingin kot khat ahung hawnsak a.

¹³Hinanleh ka unaupa Tita ka muhlouh jiakin kakha atawldam theikei a, hinanleh amauhte khakhia in, hua a pat in Mesidonia gam ah kapaita hi.

¹⁴Tuin Krist a gualzohna hung piajingtu leh, kou zang a munchin a amah theihjingna gimnamtui thehjaktu Pasian kiang ah kipahthu om hen!

¹⁵Ajiak hundam a omte leh mangthangte lak ah Pasian a ding in Krist gimnamtui ka hi uhi.

¹⁶Lawikhat kiangah sihna ding a sihna gimnamtui ka hi ua, tualeh adang kiangah hinna ding a hinna gimnamtui ka hi uhi.

¹⁷Ajiak mi tampi`n Pasian thu a mi khem a dangka jonna a azak bang un kou ka zangkei uhi, tuasangsik in chihtak tak in Pasian a bangin Krist ah Pasian mitmuh in thu ka genjaw uhi.