Read Thangal Naga 2 KORINTE 4 Bible Online

2 KORINTE 4 - Thangal Naga bible

2 KORINTE 4

¹Tuajiakin, hehpihna ka muh bang ua hih nasepna katan jiak un, ka lungkia kei uhi.

²Hinanleh sil jumhuai kiphualte ka tawpsan ta ua, zulhjauna a hilou in, ahihkeileh, Pasian thu mikhemna a zanglou in. Hinanleh thutak hihlatna a zangjaw in, Pasian mitmuh ah michih sia leh pha theihna ka hihtungjaw uhi.

³Hinanleh ka tangthupha uh phual a aom leh mangthangte kiangah ahi phual a a om.

⁴Pasian mel bakpih Krist tangthupha thupina vak in amauh asalhvak theihlouhna dingin, huate ah hih leitung pasian in agingta loute lungsim ahihmial sakta hi.

⁵Ajiak kou leh kou ka kigen thang kei ua, hinanleh Krist Jesu hih Toupa ahi chih leh, koupen na sila uh ka hi uh chih ka gen jaw uhi.

⁶Ajiak, Jesu Krist mel a Pasian thupina theihna vak hungpia dingin, miallak a kipan a vak hung vakkhia ding a thupiatu Pasian in ka lungtang uh asalhvakta hi.

⁷Hinanleh sil bawltheihna thupina pen kou a pat hilou a, Pasian a pat ahihjawk theihna dingin hua gou pen leibel ah kakem uhi.

⁸Ka kimkawt uah nehgawp in ka om ua, hilehzong sukguai in ka om naikei uhi, lungkham in ka om ua, hinanleh ka lungkia kei uhi;

⁹gawt in ka om ua, hinanleh taisan in ka om kei uh, satgawp in ka om ua, hinanleh hihsiat in ka om naikei uhi.

¹⁰Jesu hinna ka pumpi ua hihlat a a omtheihna dingin, bangchiklai peuhin Jesu sihna kapua kawikawi uhi.

¹¹Ajiak pen Jesu hinna zong ka pumpi uh sithei a hihlat a a omtheihna dingin, kou ahing nalaite pen bangchiklai peuhin Jesu jiak a si dingin piakkhiat in ka om uhi.

¹²Tuachi`n kou ah sihna in asem a, hinanleh nou ah hinna in asem hi.

¹³“Ka gingta a, tuachi`n ka gen ta hi,” chih gelh bangin. Hua ginna kha mah nei in, kou zong ka gingta ua, tuajiakin ka gen uh ahi.

¹⁴Ajiak Toupa Jesu kaithou kikpa in, kou zong Jesu tawh ahung kaithou ding a, noutawh amai ah ahung tutding hi, chih ka thei uhi.

¹⁵Ajiak Pasian thupina ding a mi tampite kipahthu gen jiak a hehpihna akhansem theihna dingin sil jousiah nouding jiak a omsiang ahi.

¹⁶Tuajiakin ka lungkia kei uh, hinanleh ka pualam mihing uh kiam hiaihiai nanleh, ka sunglam mihing uh niteng a hihhalh in a omjing hi.

¹⁷Ajiak tomnoukhat sung ka gimthuakna uh jangnoukhat in tangtawn thupina giktak thupi jawsem in ahung bawlsak hi.

¹⁸Sil muhtheihte enlou in, hinanleh sil muhtheihlouhte ka enjaw uhi, ajiak sil muhtheihte tomnoukhat sung a ding ahi a, hinanleh sil muhtheihlouhte pen tangtawn a ding ahijaw hi.