Read Thangal Naga 2 KORINTE 6 Bible Online

2 KORINTE 6 - Thangal Naga bible

2 KORINTE 6

¹Tuachi`n kou amah tawh semkhawmte hi in zong, Pasian hehpihna phattuampih lou a, bangmahlou na suahsak louhna ding un kung ngen uhi.

²Ajiak aman: “Hun kipahhuai ah, kung ngaikhia a; hundamna ni ah, kung panpih hi.” Ngaiun! tu hun kipahhuai ahi a; tu hundamna ni ahi, achi hi.

³Ka nasep uh dem a a omlouhna dingin sil bangmah ah hehna ding ka bawl kei uhi.

⁴Hinanleh Pasian nasemte ka hi uh chih sil jousiah ah ka chiansak ua, thuaktheihna ah, haksatna ah, taksapna ah, lungkhamna ah.

⁵Jepna ah, thong tangna ah, buaina ah, sepgimna ah, ihmutmohna ah, an ngawlna ah.

⁶Siangthouna in, theihna in, thuaktheihna in, lungnemna in, Khasiangthou in, itna diktak in,

⁷thutak thu in, Pasian sil bawltheihna in, jiat leh vei a diktatna galvan in.

⁸Zahbawl leh zahbawl louhna in, gensiatna leh genphatna in, mikhemtute bang in, hitalehzong midiktat hi-ngal in;

⁹theihphaklouh bang in, hitalehzong hoihtak a theih hi-ngal in, si ding bang in ngaiun, ka hing uhi, vuakgawp bang in, thahjaw hilou in;

¹⁰lungkhamtak bangin, hitalehzong kipak jing ngal in, mijawng bang in, hitalehzong mi tampi hausasak ngal in, bangmah neilou bangin, hitalehzong sil tampi neingal in.

¹¹Aw Korinmite! na kiang uah kakam uh ka kak ua, ka lungtang uh ka hong lian uhi.

¹²Kou itna kham a om na hikei ua, na lungsim ua nouma itna in ahung kham na hijaw uhi.

¹³Tualeh kou hung piak bang nung piak theihna ding un, tate kiang a thugen bang in ka gen uhi. Na lungsim uh honglian un, chi in.

¹⁴Gingloute tawh kituakloupi in hakkol puakhawm kei un. Ajiak diktatna leh diktatlouhna in bang ki thuahkhawm na anei a? Tualeh vak leh mial in bang ki pawlkhawm na anei a?

¹⁵Tualeh Krist leh Belial in bang kituahna anei ua? Ahihkeileh gingtu leh gingloumi in bang tankhawm anei ua?

¹⁶Tualeh Pasian tempul leh milimte`n bang kilemna anei ua? Ajiak pen nou Pasian hing tempul na hi uhi! “Pasian in amau uah ka teng ding a amau uah kavak ding a; amauh Pasian ka hi ding a, tualeh amauh ka mite ahi ding uh,” Pasian in achi hi.

¹⁷Tuajiakin, “Amauh a pat in hung pawtkhia unla atuam in om un. Sil sianglou khoih kei un, tuachi`n kungpom thei ding a.

¹⁸Na pa uh ka hiding a, tualeh nou ka tapate ka tanute na hi ding uh, Toupa hat tungnung in achi hi.”