Read Thangal Naga 2 KORINTE 8 Bible Online

2 KORINTE 8 - Thangal Naga bible

2 KORINTE 8

¹Tuate ban ah unaute aw, Mesidonia gam a saptuamte tung a Pasian hehpihna piak a om pen kung theihsak ding hi.

²Tuachia haksatna a etkhiatna thupitak a etkhiat a aom ua zong a kipak mahmahna uh leh azawn mahmah na uh asilphalna uh ahung hihdan bang.

³Ajiak ahihzoh bang un, ahi, ahihzoh sang ua thupijaw in amau`n phaltak in apia uhi, chih ka theihpih hi.

⁴Hua silpiak sansak dingin leh misiangthoute nna sepna a azauh theihna ding un ka kiang uah ahung ngen ngut ngut uhi.

⁵Tualeh hihpen ka kinep bang ua hilou in! Hinanleh Pasian deihlam in amauh mahmah Toupa kiang leh kou kiangah a kipia masa phot uhi.

⁶Tuachi`n tu masang a apatsa, hua hehpihna pen nalak ua semjou dingin Tita ka kun uhi.

⁷Hinanleh sil bangkim a, ginna ah, thugenna ah, theihna ah, na phattuam ngaihna jousiah uah, tualeh kou nung itna uh na hauhdan bang uh, hih hehpihna ah zong nahauhna ding uh ngaihtuah un.

⁸Thupiak bang in ka gen kei a, midangte phattuam ngaihna in, na itna uh a kitakna etkhiatna in ka gen ahijaw hi.

⁹Ajiak, i Toupa uh Jesu Krist hehpihna pen nathei uhi, a gentheihna jiak a nung hauhsat theihna ding un, amah pen hausa nanleh nou jiakin ajawng in ahung kibawl ahijaw hi.

¹⁰Tualeh hih ah kung hasot hi, ajiak hihpen nou a dingin ahoih hi, kumkhat masang a bawl pankhin nahita ua, napat khit guak uh hilou in, phattuamngaih zong na ut uhi.

¹¹Hinanleh utding a mansa a na om bang un! Na neih bang jel ua tangtunna zong a omtheihna dingin tu in sem tangtungta un.

¹²Ajiak utna lungsim a om phot leh, mi aneihlouh dan dungjui a hilou in, aneihdan dungjui a pomsak ahi.

¹³Ajiak midang gimlou a nou nagim nang uh kachihna ahi kei hi.

¹⁴Hinanleh tu leh tu a naneihval uh pen amauh taksap awng hukna ahung hih a, amauh neihval zong nou taksap awng hukna ahung hihtheihna dingin kibakgual chiatna dingin kachi ahijaw hi. Tuachi`n kibakgual chiatna ahung om ding hi.

¹⁵“A khawmtam in aval in aneituan kei a, a khawmtawm in zong, atasam tuan kei,” chih gelh bang in.

¹⁶Hinanleh natung ua huachibang phattuam ngaihna Tita lungtang a omsaktu Pasian kiangah kipahthu om hen!

¹⁷Ajiak kou ngetna jiak guak hilou in, hinanleh amah phattuam ngaihna mawng a, ama utthu a na kiang ua hung pai ahi.

¹⁸Tualeh amah tawh tangthupha lam a ahoihna thu saptuam pawl jousiah a kithang unaupa pen kung sawl uhi.

¹⁹Tualeh hihguak zong hilou in, hinanleh Toupa thupina ding leh panpih ka utdan uh etsakna-a a-nna kasep uh, hih hehpihna thu a kou tawh jinkhawm jel ding a saptuamte`n atel mawng uh ahi.

²⁰Kiphaltak a kipia hih silte ka hawmna uah dembang a ka omlouhna ding un pilvangtak in ka sem uhi.

²¹Toupa mitmuh guak a hilou in, mihing mitmuh ah zong sil kilawm ka ngaihtuah uhi.

²²Tualeh amauh tawh i unaupa uh kasawl ua, amah pen sil tampi a a phattuamngaih dan ka theichianta ua, hinanleh tu takngel in natung ua taksanna liantak aneih jiakin phatuam angaijaw sem hi.

²³Tita tungtang thu ahihleh, amah pen noulam thu ah kalawi leh ka naseppih ahi, tualeh i unaute uh ahihleh saptuam pawlte thu puatu leh Krist thupina ahi uhi.

²⁴Tuajiakin, amauh pawl leh saptuam pawlte mai ah na itna uh theihchianna leh nou kung suanna uh ensak un.