Read Thangal Naga GALATIATE 1 Bible Online

GALATIATE 1 - Thangal Naga bible

GALATIATE 1

¹Paul, mihing a pat hilou, mihing vang a zong hilou, Jesu Krist leh Pa Pasian misi lak a amah kaithoutu vang a hijaw in.

²Tualeh ka kiang a om unau jousiahte`n Galatia gam a saptuam jousiahte kiang ah:

³Pa, Pasian leh i Toupa Jesu Krist kiang a kipan hehpihna leh khamuanna na kiang uah om hen.

⁴Amah pen Pasian leh i Pa uh deihdan dungjuiin tulai gitlouhna khang hun a kipan a hung suahtaksak theihna dingin i khialhnate ta`ng in a kipiata hi.

⁵Pasian kiangah thupina tangtawn tangtawn in omjingta hen! Amen.

⁶Krist hehpihna a nou hung samtu amah a pat tu kikal a tangthupha dang a na kisuansan uh lamdang kasa hi.

⁷Huapen, “tangthupha dang ahi kei a,” hinanleh nou hung hihbuai in Krist tangthupha a hiloulam a hei ut mi khenkhat a om uhi.

⁸Hinanleh kou hi in, ahihkeileh vantungmite hitaleh tangthupha na kiang ua ka gen uh loungal tangthupha dang mawng mawng na kiang ua hung kigen a om leh hamsiat in om hen!

⁹Tuma a ka gen bang un tuin zong ka genkik ahi, tangthupha na muhpen uh loungal tangthupha dang mi kuapeuhin na kiang ua a hunggen leh hamsiat in om hen!

¹⁰Ajiak, ken tuin mihing deihsakna ahia ka jon? Ahihkeileh Pasian a! Ahihkeileh! Mihing suklungkim sawm ka maw leh? Mihing suklungkim sawm nalai hileng Krist sawltak ka hikei ding hi.

¹¹Hinanleh unaute aw, ka tangthupha genpen mihing lam thu ahi kei chih kung theisak hi.

¹²Ajiak mihing a pat ka muhzong ahi kei a, mihing hilh zong ka hikei hi, hinanleh Jesu Krist kilakna jiak a ka muh ahijaw hi.

¹³Ajiak tu-ma a Judamite biakdan a ka omlai a ka tungtang, bang chibang a Pasian saptuamte theihtawp a bawlgenthei a, tokbuaitu ka hihdan na jata uhi.

¹⁴Tualeh ka pu leh pate thugin a phattuam ka ngaihdiak jiakin Judate biakdan lam ah zong ka chipihte lak ah ka khan-gual tampi tungah kana leng hi.

¹⁵Hinanleh kanu gilsung a ka omlai a pat hung na koihtuamtu leh a hehpihna a hung samtu Pasian in.

¹⁶Jentelte lak a a tangthupha ka gentheihna dingin a Tapa pen keimah kiang a kilaksak hoih asaklai in, taksa leh sisan ka dong kei a,

¹⁷Jerusalem khua ah kei sang a sawltak himasajawte kiang ah zong ka paitou kei a, hinanleh Arabia gam ah ka paijaw a, tualeh Damaska khua ah kung kilehkik ta hi.

¹⁸Tuachi`n kum thum nungin Jerusalem khua ah Peter kimuhpih dingin ka paitou a, a kiang ah nisawm leh ni nga ka va om hi.

¹⁹Hinanleh Toupa sanggampa Jakob chihlouh sawltak dang khatbek ka mukei hi.

²⁰Tuin na kiang ua ka thugelhte, en un, Pasian mai ah ka juaukei hi!

²¹Huanung in Suria gam leh Silisia gam ah ka paita hi.

²²Tualeh Juda gam a Krist a om saptuamte meltheihlouh in ka om nalai hi.

²³Hinanleh, “Tuma a ei hung bawlgenthei pa`n khatvei laia a suksiat taak ginna pen tuin a tangkoupihta hi!” chih thu guak aja uhi.

²⁴Tualeh amau`n keimah jiakin Pasian aphatta uhi.