Read Thangal Naga GALATIATE 2 Bible Online

GALATIATE 2 - Thangal Naga bible

GALATIATE 2

¹Tuachi`n kumsawm leh kumli nungin Barnaba tawh Jerusalem ah ka paitou kik a, Tita zong ka zohpih uhi.

²Tualeh kilakna dungjuiin ka paitou a, Jentelte kiang a ka tangthupha genpen a kiang uah ka hilh a, hinanleh mi zah om deuhte atuam in ka hilh a, atuachih keileh bangchidan hiam in athawn a tai ka hikha ding hi.

³Hitalehzong ka kiang a om Tita pen Grikmi ahihhang in tep tansak teitei in a om kei a,

⁴tualeh huapen sila ahung tansak theihna ding ua, Krist Jesu a i zalenna enkhia ding a, aguk a hunglut unau takloute jiakin ahi.

⁵Hinanleh tangthupha thutak pen na kiang ua a omjing theihna dingin dakkal khatsung maimai zong a thunuai ua kipialut naisailou ka hi uhi.

⁶Hinanleh mi zah-om deuh a ka gente lak ah pen bang chibang ahita un zong kei dingin akhawk kei, mi zah om a ka gente`n bangmah ahung gensak tuankei uhi.

⁷Hinanleh gensak naksang in, teptante tangthupha Peter kianga kepsak a aom bangin teptanloute tangthupha ka kiang a kepsak in a om chih a thei uhi.

⁸Ajiak teptante sawltak hi ding a Peter kiang a nasemtu mah in, Jentelte sawltak hiding in keimah ah sil thupitak in abawl hi.

⁹Tualeh khuam bang hial a om Jakob, Kifa leh Johan in ka kiang a hehpihna hung kipia atheihtak un kou Jentelte kiang a pai a, amauh teptante kiang a pai ding in kei leh Barnaba kipawl khawmna khut jiatlam ahung pia uhi.

¹⁰Migentheite ka theihjing uh adeih ua, huapen ken zong ka bawlsawm mawng ahi.

¹¹Hinanleh Antiok khua a Peter a hungpai takin, demna a om jiakin a maitang ah ka na salh hi.

¹²Ajiak aman Jakob kiang a pat mi kuate hiam ahung paima un Jentelte kiang ah an a nejel a. Hinanleh amauh a hungpaitak un teptante a laujiak in a tawp kik a, atuam omta hi.

¹³Tualeh Judami dangte zong amah tawh alepchiah ua; tuachi`n Barnaba nasan zong alepchiah na uah puimang in a omta hi.

¹⁴Hinanleh tangthupha thutak bang a ginhuaitak bangin a omkei uh chih ka muh tak in, Peter kiangah, a un ua amai uah, “Nang, Judami hi chin a, Judate om bang a omlou a, Jentelte om bang a na om ngal leh bangding a Jentelte Judami ombang a omsak sawm na hia?” ka chi hi.

¹⁵“Eipen Jentel mikhialte i hikei ua,” Judami mawng a piang i hi uhi.

¹⁶Dan silte bawljiak in mi siamtansak in a om kei a, hinanleh Jesu Krist gintatna liuliau in siamtang in a om uh chih ithei uhi. En zong dan silbawl jiak hilou a, Krist ginna jiak a siamtang a i omtheihna dingin Jesu Krist pen i gingta uhi, ajiak dan silte bawljiak in kuamah siamtang in a om kei ding hi.

¹⁷Hinanleh Krist a siamtang a omsawm kawm pi a eimah ngei zong mikhialte i nahihleh, tuajiak in Krist khialhna nasemtu ahi diai leh? Hibaih baihlou!

¹⁸Keimah in ka silbawlsiatte bawlpha kik taleng, dan bawtsiatu ka hi chih ka kitheisak giap ahi ding hi.

¹⁹Ajiak pen Pasian lam a ka hintheih nangin, dan jiakin dan lam ah ka sita hi.

²⁰Krist tawh kilhden in ka omta hi, hinanleh ka hing hi. Keimah hing hinawnlou in, Krist keimah a hing ahijaw hi; tualeh tu a taksa a ka hinna pen, ahung it a ka tang a kipiapa Pasian Tapa ginna a hing ka hi.

²¹Pasian hehpihna pen bangmah lou in ka koih kei, ajiak dan jiak a siamtanna om ahihleh Krist amawkna a si ahi ding hi.