Read Thangal Naga GALATIATE 5 Bible Online

GALATIATE 5 - Thangal Naga bible

GALATIATE 5

¹Tuajiakin, sila hinawnlou ding a Krist in a hung zalensakna ah dingkip unla, sila hakkol ah ta`ngkik nawn kei un.

²Adiktak in! Keimah Paul in na kiang uah ka gen ahi, tep natan uleh Krist nou a dingin bangmah phatuamlou ding ahi.

³Tualeh teptante jousiah kiangah, dan jousiah juihding nabat uh ahi, chih kung theisak kik hi.

⁴Nou, dan a siam kitangsak jousiahte, Krist pen nou a dingin a phatuam lou ahita a, hehpihna a pan na pukta uhi.

⁵Ajiak kou, kha jiakin ginna a siamtanna kinepna pen kilawptak in ka ngak uhi.

⁶Ajiak, Jesu Krist ah teptan pen bangmah aphatuam kei a, teptanlouh zong bangmah a phatuam kei hi, hinanleh itna tungtawn a sem ginna a phatuam hi.

⁷Hoihtak in na tai uh, thutak juilou dingin kuan ahia ahung dal?

⁸Hih khemna pen nou hung samtu a pat ahikei hi.

⁹“Tol themnou khat in tanghou beupi ajelsuak hi.”

¹⁰Nou lungsim dang na ngaihtuah kei ding uh chih Toupa ah kung muang hi, hinanleh nou hung hihbuaitu in, kua hitaleh zong, atung a thutanna athuak ding hi.

¹¹Tualeh unaute aw, ken teptan thu gen nalai ka hihleh, bangding a hihgentheih a om nalai ka hia? Atuachi ahihleh kross a kipalpukna pen abei ahita ding hi.

¹²Nou hung hihbuaite ki satkhia maileh ka ut hi!

¹³Ajiak unaute aw, zalen ding a sap na hi ua, na zalenna uh taksa ding a lemtanna in zang kei unla, hinanleh itna in khat leh khat na kisepsak tuah jaw un.

¹⁴Ajiak, “Nang mah na ki it bangin na innvengte na it ding ahi,” chih thu tengkhat ah danthu jousiah sukbukim in a om hi.

¹⁵Hinanleh na kihei ua, na kinek tuah uleh na kihihmang louhna ding un pilvang un.

¹⁶Tuachi`n hih ka gen hi, kha ah om un, tuahileh taksa utna na hihtangtung kei ding uhi.

¹⁷Ajiak taksa in kha a dou a, kha in taksa a dou hi. Ajiak sil na bawlsawmte uh na bawl theihna ding un, hihte pen a kikalhtuah uhi.

¹⁸Hinanleh kha lamkaih a na om uleh dan nuai a om na hi kei uhi.

¹⁹Tualeh taksa silbawlte a kilang hi, huapen hihte ahi, angkawmna, kingaihna, thanghuaina, hukna;

²⁰milim biakna, bumna, muhdahna, kihauna, thangsiatna, hehna, mahni angsung khualna, omtuamna;

²¹deihgohna, tualthahna, uainkhamna, gualnop bawlnate, leh huachibang dang dangte ahi. Huachibang bawlte`n Pasian gam aluah kei ding uh, chia masang a kung hilhtak mahbang in, kung mahilh hi.

²²Kha gahte ahihleh, itna, kipakna, khamuanna, thuakzohna, nunnemna, hoihna, gin omna,

²³omdan siamna, kidek theihnate ahi. Hihte kalh in dan a omkei hi.

²⁴Tualeh Krist a ahi mite`n taksa pen alunggulhna leh aduhgawlna tawh a kilhdenta uhi.

²⁵Kha a hing i hihleh, kha mah in i om ding uhi.

²⁶Khat leh khat i kikhem kei ding ua, i ki thangpaisak kei ding ua, i ki engsiattuah kei ding uhi.