Read Thangal Naga GALATIATE 6 Bible Online

GALATIATE 6 - Thangal Naga bible

GALATIATE 6

¹Unaute aw, mi kuahiam a hihkhialhna a matkhiat a a omleh, nou kha mite ngei zong khemna na tuakkha ding chih ngaihtuah in, huachi bang mi pen nunnemna lungsim tawh dingsak kik un.

²Khat leh khat na puakgikte uh kidawn chiat unla, tuachi`n Krist dan hihbukim un.

³Ajiak mi kuahiam khat bangmah hiloupi a aki ngaihsang leh, amah leh amah kikhem ahi.

⁴Hinanleh michih in ama nasep ki etchianjaw hen, tuachi`n midang tung hilou in a mahmah tung ah a kipak ding hi.

⁵Ajiak michih in a puakchiat akipuak ding ahi.

⁶Thuhilh a ompa in ahilhtu kiang ah silhoih jousiah piaphal hen.

⁷Khem in om kei un, Pasian pen simmawh gual ahi kei hi, ajiak mi`n atuh khatpeuh, huamah a atding uhi.

⁸Ajiak taksa lam a tuhpan taksa lam a siatna a atding a, hinanleh kha lam a tuhpan kha lam a tangtawn hinna a atding hi.

⁹Tualeh silhoih bawl i chimtak kei ding uh, ajiak i lungkiat keileh ahuntak in i atding uhi.

¹⁰Tuajiakin, hun lemtang i neih bangjel un mi jousiah kiang ah silhoih i bawl ding uh, adiak in ginna a i innkuanpihte kiangah i bawl ding uhi.

¹¹Keima khut mahmah a, na kiang ua ateng lianpipi a laikhak kunggelh en un!

¹²Taksa a kilat-hoih sawmten teptan dingin nou ahung sawl teitei uhi, ajiak bangmah dang hilou in, Krist kross jiak a gimthuakna a thuaklouhna ding un ahi hi.

¹³Ajiak, amauh teptan mawngte`n zong danthu a juituankei uhi, hinanleh na taksa ua kiletsakpih ding a neihtheihna ding un tep tanle uchin chih adeih uh a hiphet hi.

¹⁴Hinanleh ken, i Toupa Jesu Krist kross chihlouh ngal ka suanlouh ding dan Pasian in a hungkham hi; amah jiakin leitung kei dingin kilhden ahita a, tualeh kei leitung dingin asi ka hita hi.

¹⁵Ajiak pen Krist Jesu ah siamthakna loungal; teptan, ahihkeileh teptanlouh hitaleh, bangmah aphatuam kei hi.

¹⁶Tualeh hih danbang a om jousiahte tung ah khamuanna leh kituahna om hen!

¹⁷Tu-a kipat in kuaman hung tokbuai nawn kei uh hen, ajiak ka taksa ah Toupa Jesu chiamtehna ka pua hi.

¹⁸Unaute, i Toupa Jesu hehpihna na kha uh kiangah om hen. Amen.