Read Thangal Naga EPHESATE 2 Bible Online

EPHESATE 2 - Thangal Naga bible

EPHESATE 2

¹Tualeh nou na bawhsiatnate uleh na khialhnate uh jiak a sisa pen ahung hundam a.

²Hua-ah, tu masang in hih leitung dan bang in na om ua, huihkhua a thuneitu lal, tu a thumang lou tate sung a nasemjingtu kha dan bang in na vak ua.

³Huate lak ah eite zong tu masang in i taksa utna ah, i taksa leh i lungsim utna hih bukim in i om ua. Tualeh midangte bangin piandan mawng a thangpaihna tate i hi uhi.

⁴Hinanleh Pasian, hehpihna haupa in, a itna thupitak a eite ahung it jiak in,

⁵khialhna a si i hihlai un zong Krist tawh ahung hingsakta a. Hehpihna jiak a hundam na hi uhi.

⁶Tualeh Jesu Krist tawh ahung kaithou khawmta a, van munte ah ahung toukhawmsak ta hi.

⁷Tuachi`n hun hungtung dingte ah Jesu Krist jiak a itung a achitna a ahehpihna hauhdan ahung ensak ding hi.

⁸Ginna jiak a hehpihna a hundam na hi uhi, huazong noumau a suak a hikei a, Pasian silthawnpiak ahi.

⁹Nasep jiak ahikei a, atuachih keileh miin a suangkha ding uhi.

¹⁰Ajiak Pasian in masanglai pek a i omna ding a ana guatkholh, Krist Jesu a nna hoih semding a siam, ama khutsuak i hi uhi.

¹¹Tuajiakin, “Nou masang laia Jentel, teptanlou ahung chihte uh,” (taksa khut a tan teptan achihte un.)

¹²Huachihlai a Krist neilou a, Israel khua leh tui tawh kimatlou a, leitung a kinepna bei leh Pasian neilou a na om ua, thuchiam thukhunte lak a mikhual a na om nahih uh theijing un.

¹³Hinanleh tuin pen Krist Jesu ah, nou nidanglai a gamlapi a omte, Krist sisan jiakin suknai in na omta uhi.

¹⁴Ajiak amah pen i kilemna uh ahi a, i kikal a ki daidanna baang pen hihchim in, nihte pen pumkhat in a bawlta hi.

¹⁵Biakna silbawlte a thupiak dan omte ki melmaknate pen a taksa a hihmang in, amah ah nihte pen mihing thak khat a siam dingin kilemna a bawlta hi.

¹⁶Ki melmaknate pen kross a hihlum in, huamah in nihte pen pumpi khat a Pasian tawh a kilepsak theihna ding in.

¹⁷Tualeh amah hungpai in, nou gamlapi a omte kiangah lemna thu hung gen in, tualeh naitak a omte kiang ah zong ahung gen hi.

¹⁸Ajiak, amah jiakin eiten kha khat in Pa kiang a luttheihna inei tuakta uhi.

¹⁹Tuajiakin tuinjaw zin leh gamtuammi na hinawn kei ua, hinanleh misiangthoute tawh tualsung khat leh Pasian innkuante na hijawta uhi.

²⁰Tualeh Jesu Krist pen aning a suang poimoh pen hung hi in, sawltakte leh Jawlneite suangphum lepsa tung a lam na hi uhi.

²¹Ama inn lam jousiah kituaktak a leptuak in, Toupa ah tempul siangthou in a khangtou hi.

²²Amah ah nou zong kha a Pasian tenna ding a lamkhawm na hi uhi.