Read Thangal Naga EPHESATE 4 Bible Online

EPHESATE 4 - Thangal Naga bible

EPHESATE 4

¹Tuajiakin, kei, Toupa a thongkia in, sap a na omna utawh kituak a gamta dingin kung ngen hi.

²Ki ngaingiamna leh migitna tengteng, thuakzohna tawh itna in na kithuakjou chiat un.

³Lemna guia kankhawm a kha a ki pumkhatna pen vom tinten dingin hahpan in pang un.

⁴Sap a na omna pen uh kinepna, munkhat a sap na hih mahbang un pumpi khat leh kha khat.

⁵Toupa khat, ginna khat, baptisma khat;

⁶Pasian khat leh mi jousiah Pa, bangkim tung a om leh bangkim a om, tualeh noute jousiah ah a om hi.

⁷Hinanleh Krist sil thawnpiak tehna bangjel in hehpihna pen i kiang chiat uah piak in i om uhi.

⁸Tuajiakin Laisiangthou in aman, “Tunglama a kahtouhlai in, sal a matte sal in apui a; tualeh mihingte kiangah sil piakte apia hi,” chi`n agen hi.

⁹Tuin, hih ahi, “a kahtouh chih pen,” amasa in leimun ngiampen ah a kumsuk chihlouh bangdang chihna ahi diai leh?

¹⁰A kumsuk pen ahihleh sil jousiah a sukbukim theihna ding a van jousiah tunglam pek a kahtoupa mah ahi.

¹¹Tualeh aman “khenkhatte sawltak, khenkhatte Jawlnei, khenkhatte tangthupha gentu, khenkhatte Pastor dingin, tualeh khenkhatte thuhilh sia dingin apia hi.”

¹²Ajiak misiangthoute kithuamna ding, nasepna ding leh Krist pumpi bawlhoihna ding in.

¹³Ginna leh Pasian Tapa theihna lam a ki thutuak a, piching a Krist bukimna tehna dungtan i phakchiat masiah un.

¹⁴Tuachi`n diklouhna khemna bangin, lepchiah pil a mihing khem a om a, thugin huih chinteng a alang alang a mutleng kawikawi naupangte i hi nawn kei ding ua.

¹⁵Hinanleh itna a thutak gen in, sil jousiah ah amah ah i khangtou thei jawding hi, Krist, amah pen lutang ahih jiak in.

¹⁶Amah a pat pumpi kituaktak a zopkhawm a om in, guhtuah chinteng in sa hiang dang chinteng nasepna apiakdan dungjui chiat a, pumpi itna a ki bawlhoih in a khangtousak hi.

¹⁷Tuajiakin hih ka gen ahi, tualeh Toupa ah kung theisak hi, Jentelte alungsim ginatlouh jiak uh pua a aom bang un omnawn mawng mawng kei un

¹⁸a theihsiamna uh sukmial a om in, asung ua bangmah theih theihlouhna a om jiakin, a lungtang uh atak jiakin Pasian hinna a pat puaseh in a om uhi.

¹⁹Amau`n theihtheihna mawng mawng aneih nawnlouh jiak un sil sianglou chinteng duhgawltak a bawl ding in hukna ah a ki pialutta uhi.

²⁰Hinanleh nou Krist thu huachibang in na jil kei uhi!

²¹Jesu a om, thutak dungjui a amah thu ja a amah thuhilhna a om taktak na hih ua ahihleh.

²²Na nidanglai omdan ua mihing lui, khemna duhgawlna hoihloute koihkhia unla.

²³Na lungsim kha uah athak in hung om un,

²⁴mihing thak, diktatna leh siangthouna Pasian bang a siam pen silh un.

²⁵Tuajiakin, juaugen tawpsan in! Michih in avengte kiang ah thudik genchiat hen, ajiak eite khat leh khat ki hiangtuah chiat i hi uhi.

²⁶Heh unla, hinanleh khial kei un, na hehna uh ni in tumpih kei hen.

²⁷Setan mun awn kei un.

²⁸Guta in gu nawnkei henla, hinanleh tasam kiang a piak ding a neihtheina dingin, a khut a silhoih bawl in semgimjaw hen.

²⁹Na kam ua pat thusia pawtkei henla, hinanleh a ngaikhiatute kiang a hehpihna a piaktheihna dingin, bawlhoihna dingin thuhoih pawtjaw hen.

³⁰Tualeh Pasian Khasiangthou dahsak kei un, tatnani a ding a amah a chiamteh na hi uhi.

³¹Kha`tnate, thangpaihnate, hehnate, husangnate, kigensiatnate, hihte jousiah nalak uapat koihmang in omta hen, gitlouhna jousiah tawh.

³²Khat leh khat kingaina tuah chiat unla, lungnem unla, Pasian in Krist a nou ahung ngaihdam bangin, nou zong khat leh khat ki ngaihdam tuah chiat un.