Read Thangal Naga EPHESATE 6 Bible Online

EPHESATE 6 - Thangal Naga bible

EPHESATE 6

¹Naupangte aw, Toupa ah na nulehpate uh thu mang un, ajiak hihpen sildik ahi.

²“Na nu leh na pa zahtak in,” hih pen thupiak chiamnei masa pen ahi:

³“tuachi`n nang a dingin ahoih ding a, leiah zong na damsawt ding hi.”

⁴Tualeh nou pate aw, na tate uh thangpaisak kei unla. Toupa thununna leh thuhilhna ah kemjaw un.

⁵Silate aw, Krist thu na man bang un, lauhdan siam leh kithing pum in; lungsim a chitak in, taksa dan a napute uh thu mang un.

⁶Mihing kipaksak ding a mitmei guak veng hilou a, Krist sila bang a lungtang a Pasian deihlam bawl ding in.

⁷Mihing kiang a hilou in, Toupa kiang a silhoih deih a nasem in.

⁸Michih in, sila hiin zalen hitaleh silhoih abawl taphot uh Toupa kiang a pat huamah amukik ding uh chih thei in bawl hen.

⁹Tualeh nou pute aw, tuachimah bangin akiang uah bawl un, amauh leh nou pu pen van ah a om chih leh, aman mi deihsak tuam aneikei chih thei in, vaubawl kei un.

¹⁰Atawppen in, ka unaute aw, Toupa ah leh ahatna silbawltheihna ah hattak in om un.

¹¹Setan ze-khemna na douzohna ding un Pasian galvan bukim in kithuam un.

¹²Ajiak i doute pen taksa leh sisan ahikei a, mialtung a vaihawmtute leh, van munte a kha gilou omte ahijaw uhi.

¹³Tuajiakin ni hoihloute a na douzohna ding uleh, na bawlzoh siang nung ua zong na dintheihna ding un, Pasian galvan bukim la un!

¹⁴Tuajiakin, na kawng uh thutak a gak in, diktatna awmphaw gak in,

¹⁵lemna tangthupha ki sakkholhna pen na keng uah bulh in ding un.

¹⁶Hihte tengteng tung ah ginna lum la un, hua tawh giloupa thal kuangthei na sumitthei ding uhi.

¹⁷Tualeh hundamna sik Lukhu leh, kha namsau Pasian thu la un.

¹⁸Thumna leh ngetna chinteng in bangchiklai peuh in kha a thumjing a om in, hih atawpna lam ah misiangthoute ding in thuak hatna leh ngetsakna tawh pilvang tak in omjing un.

¹⁹Tualeh kei dingin zong tangthupha thu kiphual theisak ding a hangsan tak a kakam ka kak a, thugen theihna piak a ka omtheihna ding in.

²⁰Hua a ding a sik kolbulh palai ka hi hi, hualam pang ka gen ding bang a hangsan tak a ka gentheihna ding in hung thumsak un.

²¹Hinanleh nou zong bang chibang a ka om ka tanchin na theihtheihna ding un, Taikika, Toupa a sanggam ittak leh Pasian nasemtu muanhuai in, bangkim a hunghilh pai ding hi.

²²Ka tanchin uh na theihna ding uleh, na lungtang uh a khamuan theihna ding chi in amah na kiang ua kungsawl ahi.

²³Pa Pasian leh i Toupa Jesu Krist kianga kipan khamuanna, tualeh ginna tawh kijui itna unaute kiang ah om hen.

²⁴Chih taktak a i Toupa uh Jesu Krist itte jousiah kiang ah hehpihna om hen. Amen.