Read Thangal Naga PHILIPPITE 1 Bible Online

PHILIPPITE 1 - Thangal Naga bible

PHILIPPITE 1

¹Paul, leh Timothi, Jesu Krist silaten, Philippi khua a om Jesu Krist a misiangthou jousiahte kiang leh, saptuam upate kiang leh panpihtute kiang ah:

²I Pa uh Pasian kiang leh i Toupa uh Jesu Krist kiang a kipan hehpihna leh khamuanna na kiang uah om hen.

³Noute kung phokkhiat tengin ka Pasian kiang ah kipahthu ka gen a;

⁴ka thum tengin kipaktak in noute a dingin kung ngetsak gige hi

⁵apatni a pat a tunitan a tangthupha a nung ki pawlpihna uh jiak in.

⁶Amah na sung ua nahoih sep pankhintu in, Jesu Krist ni tanpha in huapen abawl bukim ngei ding chih muanngamna ka nei hi.

⁷Na un ua na tungtang uh thu a ken hichi bang lungsim ka neihpen adik mawng ahi. Ajiak nou ka lungtang ah kung vomjing hi; na un ua ka kolbulhna leh tangthupha venna leh hihkipna thu a hehpihna ka tanpihte na hi uhi.

⁸Ajiak, Jesu Krist lainatna in na un un kung ngai mahmah hi chih Pasian ahung theihpihtu ahi.

⁹Tualeh theihtheihna leh theihkhen theihna tengteng a na itna uh a hungtam semsem ding hih ahi ka nget,

¹⁰tuachia silhoih mahmahte nung theih ua; Krist ni tan a ataktak leh bawlkhial bei nung hihtheihna ding un.

¹¹Pasian thupina ding leh pahtawina ding a Jesu Krist a om diktatna gah a dim in.

¹²Hinanleh unaute aw, ka tung a siltungte pen tangthupha phuanjaksem a a omna ding a hungtung ahi chih natheih uh ka deih hi.

¹³Tuachi`n Innpi vengpawlte jousiah leh a dang tengteng kiangah ka kolbulhnate pen Krist ah ahi chih a kichianta hi.

¹⁴Tualeh Toupa a unau tamtak in ka kolbulh jiak a ginkipna nei in, Pasian thu laulou a gen ding in a hangsan deuh deuhta uhi.

¹⁵Khenkhatte`n thangsiatna leh kihauna jiakin Krist a tangkoupih ua, tualeh khenkhatten deihsakna jiakin zong agen uhi.

¹⁶Pawlkhatte`n ka kolbulh thuakna ki behlapsak sawm in, a taktak hilou in, mahni angsung khualna in, kikalhna dingin Krist a tangkoupih uhi.

¹⁷Hinanleh pawlkhat in ahihleh tangthupha gum ding a om ka hihdan thei in, itna jiakin a gen uhi.

¹⁸Achihleh bang akhok a, lam jousiah ah, akhem hi in atak hitaleh Krist pen tangkoupih in a omta himhim ahi. Tualeh hua ah ka kipak ahi, ahi, ka kipak jel ding hi,

¹⁹Ajiak hih in na thumna uh leh Jesu Krist kha piakna jiakin ka suahtakna ahung suak ngei ding chih ka thei hi.

²⁰Ka lam etna bang leh ka kinepna bang dungjuiin bangmah ah hihjum in ka om kei ding a, hinanleh ka hansan jing mahbang in, tuin zong, ka hinna in hiam, ka sihna in hiam, Krist pen ka pumpi ah hangsanna kim in hihlet in ka om ding hi.

²¹Ajiak kei ding in hin Krist ahi a, sih punna ahi.

²²Hinanleh taksa a hin ka tan hihenla, huapen ka sepgah hitaleh, teljawk ding ka theikei hi.

²³Ajiak nih tegel kal ah haksatak a phuk in ka om hi. Paimang a Krist kiang a om utna ka nei a, huapen ahoihjaw mahmah hi;

²⁴hitalehzong, taksa a om pen nou jiakin apoimohjaw hi.

²⁵Tualeh hih ginkipna nei in, na ginna uh khanletna ding leh na ginna ua na kipakna ding un nou tawh ka omjel lai ding hi chih ka thei hi,

²⁶na kiang ua kung paikikna jiak a, kei ding a Jesu Krist a na kipahna uh a tamsem theihna ding in.

²⁷Na omdan uleh Krist tangthupha kituaksak phot phot un, hung pai a nou kung muh ahiam, ahihkeileh ka omlouh a zong na tanchin uh, kha khat a na dinkip dan uleh, lungsim khat nei a, tangthupha thugin a na hahpan dan uh ka jaktheihna ding in.

²⁸Tualeh bangmah ah na melmate uh hihlau in omkei un; huapen amauh a ding a manthaina chiamtehna diktak ahi a, hinanleh nou a ding in pen hundamna, tualeh huapen Pasian a kipan ahi.

²⁹Ajiak, Krist jiak a nou amah na gintat uh guak hilou a, amah jiak a thuak zong na thuak ding uh ahi chih piak na hi uhi.

³⁰Keimah a hichibang kidouna na muhsa uleh, tu-a keimah a om najak bang uh, nou zong na nei uhi.