Read Thangal Naga PHILIPPITE 2 Bible Online

PHILIPPITE 2 - Thangal Naga bible

PHILIPPITE 2

¹Tuajiakin Krist a ki hehnepna bang, ki itna khamuanna bang, kha a ki pawlkhawmna bang, ki lainatna leh ki khuatuahna bang a omleh.

²Lungsim kibang a om in, itna kibang nei in, tup kibang leh lungsim munkhat a om in ka kipahna hih bukim un.

³Angsung khual a huaihamna hiam ahihkeileh ki thupisakna hiam in, bangmah bawl hikei hen, hinanleh lungsim ngiamtak in michih in amah sangin midang hoihjaw in ngaihsun chiat hen.

⁴Na lak ua mi kuapeuh in ama lunglutna guak enkei henla, midang lunglutna zong en uh hen.

⁵Jesu Krist a zong om hih lungsim nou ah zong om hen:

⁶Amah pen Pasian bang a om in, Pasian tawh kibang a om pen sil khiatlahhuai in a ngaihtuah kei a.

⁷Hinanleh, amah leh amah ki ngaisanglou in, sila bangin ahung om a, mihing bang a siam in ahung om hi.

⁸Tualeh mihing lim leh mel bang pua in, amah hung ki ngiamkhiat a, sihna tanpha in thu ahung mang a, kross a sihna tandong in zong.

⁹Tuajiakin Pasian in amah pen thupitak in a tawisangta a min laklak a min tungnung pen a piata hi.

¹⁰Tuachia Jesu min a mi jousiah, van a sil omte, lei a sil omte, tualeh leinuai a sil omte a khupdin ua,

¹¹lei chinteng in Jesu Krist pen Pa Pasian thupina ding a, Toupa ahi chih a phuantheihna ding un.

¹²Tuajiakin ka itte aw, ka omsung guak hilou in, hinanleh ka omlouh lai a zong thu na manjel mahbang un. Lau leh ling kawm in na hundamna uh semkhia un.

¹³Ajiak ama kipahpih lam silhoih bawl ding a hung utsaktu leh hung semsak ding a bawltu Pasian ahi.

¹⁴Sil jousiah niallou leh phunlou in bawl un,

¹⁵khangthak gilou leh genhakte lak a leitung vakte bang a na vaknate uh lak un. Dembei leh bawlsiat neilou Pasian tate nung hihtheihna ding un,

¹⁶hinna thu tukip in, Krist ni chiang a ken athawn in ka tai kei a, athawn in ka gimkei chia ka kipak theihna ding in.

¹⁷Ahi, na ginna sillat uleh na nasepna tung ua kei Pasian a ding a dawn ding bangin buakkhiat in om tamah leng zong, ka kipak hi, tualeh na un un kung kipahpih hi.

¹⁸Huajiak mah in nou zong kipak unla, kei zong hung ki pakpih un.

¹⁹Hinanleh na tanchin uh ka theih a lungmuang tak a ka omtheihna dingin, Timothi na kiang uah hungsawl pai dingin Toupa Jesu ah ka kilam en hi.

²⁰Ajiak ka kiangah huachi bang a gin-om tak a nou hung kem ding mi ka neikei hi.

²¹Ajiak mi jousiahin Jesu Krist silte zonglou in, amauh a ding chiat a zongta uhi.

²²Hinanleh Toupa in a Pa nna asep bangin, aman tangthupha ah kei ahung seppih chih theihchianna amah ah na nei uhi.

²³Tuajiakin bang chibang a ka om ding ka theihchian hunhun in amah hung sawlkhiat pai ka kinem hi.

²⁴Hinanleh kei mahmah ngei zong hung paipah ding in Toupa ah gintatna ka nei hi.

²⁵Hilehzong, ka sanggampa leh, ka naseppih leh, ka galkappih, na kamtai uh leh ka taksapna a hung ki thuahpihtu Epaphrodita na kiang ua hung sawl poimoh kasa hi.

²⁶Ajiak na un un a hungngai mahmah a, a damlouh thu na jakjiak un a lungkham mahmah hi.

²⁷Ajiak sidektak in a china ngutngei a, hinanleh Pasian in a hehpih a, amah guak hilou in, hinanleh kei zong ahung hehpih hi, kei ding a lungkhamna tung a lungkhamna a omkhawm louhna ding in.

²⁸Tuajiakin amah poimohngaih tak in kung sawl hi, amah na muhkik chiang ua na kipak ua, tualeh kei lungkhamna zong adaihdeuh na ding in.

²⁹Tuajiakin amah pen Toupa ah kipaktak in na sang un, tualeh hua chibangte na zahbawl un,

³⁰ajiak kei ding a nung sepsakna uh kimloute sukkimna ding in Krist nasepna ah aman a hinna zong khawksalou in, ana sidektak hi.