Read Thangal Naga PHILIPPITE 3 Bible Online

PHILIPPITE 3 - Thangal Naga bible

PHILIPPITE 3

¹Atawppen in, ka unaute aw, Toupa ah kipak un, kei a dingin angaimah gelh a chimtakhuai kei a, hinanleh nou a dingin ahoihjaw hi.

²Uite lak ah kiveng un, sil gilou bawlte lak ah kiveng un, taksa atgawpte lak ah kiveng un.

³Ajiak eite kha-a Pasian bia teptante i hi a, tualeh Jesu Krist ah i kipak mahmah a, hinanleh taksa ah pen suanding i neikei uhi.

⁴Taksa lam ah chilei zong suanding ka nei maithei, mi dang kuahiam in taksa lam a suanding neia a kigen leh, ken kanei sem hi.

⁵Nigiat ni a teptan, Israel nam, Benjamin phung, Hebrai lak a Hebrai hidiak, dan theihlam a Pharisai.

⁶Phattuam ngaih lam a saptuamte bawlgentheitu. Danbu-a diktatna lam a gensiatbei ka hi.

⁷Hinanleh, sil kei ding a punna jousiah pen Krist jiakin manna in ka simta hi.

⁸Ahi taktak ngut hi; Jesu Krist ka Toupa theihna hoihtak jiakin sil jousiah manna in kasim ahi. Amah jiakin sil jousiah ka ta`nta a, tualeh Krist ka tantheihna dingin huate tengteng ninneng bangin ka ngai hi.

⁹Tualeh danbu a om bang a keimah diktatna nei hilou a, hinanleh Krist ginna jiak a om, ginna a Pasian a kipan diktatna pen nei a amah a muh a ka omtheihna ding in.

¹⁰Tuachia amah leh athohkikna ka theihna leh, amah thuakgimna ka kikoppihna bang ka theihtheihna ding in,

¹¹bang chidan hiam bek a misi lak a pat thohkikna ka tankhakleh chi in.

¹²Hua tangkhinta ka hikei a, bukim khinta zong ka hikei. Hinanleh Jesu Krist in kei a hungmatna, huamah ka mattheih sam na ding in ka delh ahi.

¹³Unaute aw, keipen mankhinta in ka kingai kei a, hinanleh silkhat ka bawl hi, nunglam a sil omte manghilh in, tualeh mailam a sil omte delh in.

¹⁴Jesu Krist a Pasian sapna sang nuamman mu dingin phaktawpna ka delh hi.

¹⁵Tuajiakin, ei apiching deuhdeuh tengin hichibang lungsim i neichiat ding uhi. Tualeh sildang khat a lungsim dang naneih uleh, hihzong Pasian in na kiang uah ahung theisak ding hi.

¹⁶Hitaleh zong, i phakna chiangchiang ah huadan mahbang in i kalsuan ding uhi.

¹⁷Unaute aw, ka omdan hungjuite hichiat unla, huachibang a omte etton ding a nung neihte uh chiamteh un.

¹⁸Ajiak mi tampi a om uh, amau omdan tamveipi kung hilhta hi, tuin zong kappum in kung hilh ahi, amauh pen Krist kross melmate ahi uhi.

¹⁹Atawpna uh pen siatna ahi a, a pasian uh ahihleh a gilpi uh ahi a, tualeh a thupina uh zong a jumna uh ahi a, leilam silte a ngaihtuah uhi.

²⁰Ajiak ei khua leh tui hihna pen van ah ahi a, hua a kipan in i Toupa Jesu Krist hundampa i ngak uhi.

²¹Aman sil jousiah ama thu thua a omsak theihna nasepdan dungjuiin i pumpi thulimlou pen amah pumpi thupitak bangin ahung bawl thaksak ding hi.