Read Thangal Naga KOLOSSATE 3 Bible Online

KOLOSSATE 3 - Thangal Naga bible

KOLOSSATE 3

¹Tuachia Krist tawh kaihthoh a om na hihtak uleh, tunglam a Pasian jiatlam a tou Krist omna a sil omte jong un.

²Tunglam a sil omte ah na lungsim uh nga unla, leitung a sil omte ah hilou in.

³Ajiak, na sita ua, na hinna uh Krist tawh Pasian ah phual ahita hi.

⁴Krist i hinna uh ahung kilak chiangin, tuachi`n nou zong thupitak in na kilang ding uhi!

⁵Tuajiakin na taksa hiang uh lei a omte hihlum un, kingaihnate, nitnate, ki etlahnate, hoihloute, utna giloute, tualeh duhgawlnate, (duhgawlna pen milim biakna ahi).

⁶Hua silte jiakin Pasian thangpaihna thumanglou tate tung ah atung nak hi.

⁷Nou zong tu masangin hua silte a na hinlai un, huate ah na om uhi.

⁸Hinanleh tuinjaw noujong hehnate, thangpaihnate, huatnate, gensiatnate, houlimna thanghuaite, hihte jousiah na kam uapat koihmang un.

⁹Mihing luipen asilbawl tawh na koihkhiata uh chih thei in, khat leh khat kikhemtuah kei un.

¹⁰Mihing thak in na kivonta ua, huapen theihsiamna nei a, asiamtu batpih a siamthak in a omta hi.

¹¹Hua ah Grikmi leh Judami, teptan leh tanlou, melmami leh Skithiami, tualeh saltang leh zalen zong a om tuankei hi; hinanleh Krist pen bangkim ahi a, bangkim ah a om hi.

¹²Tuajiakin, Pasian mitel, misiangthou leh ittakte bangin lainatna lungtangte, chitnate, kingiamkhiatna lungsimte, nunnemnate, tualeh thuak-hatnate in kivon un.

¹³Khat leh khat kithuakjou tuah unla, ki ngaihdam tuah un, khat in khat tung a thubuai bang aneih leh Krist in nou ahung ngaihdam bangin nou zong ki ngaidam un.

¹⁴Hinanleh hih silte jousiah tung ah itna silhthuah un, huapen bukimna kankhawmna ahi.

¹⁵Tualeh Pasian khamuanna na lungtang uah vaihawmsak un, huachi bang hi dingin pumpi khat a sap na hi uhi, kipakdan zong thei un.

¹⁶Krist thu pen pilna jousiahin nou ah tampi in omsak un, phatna la bang, Pasian biakna la bang, tualeh khalam la bang, kijilsak in, ki thuhilhtuah unla, na lungtang ua hehpihna nei in Toupa ah la sa un.

¹⁷Tualeh na bawljousiah uh, thugen hi in nasep hitaleh, aun in Toupa Jesu min in, amah jiak a Pa Pasian kiang a kipahthu genkawm in bawl un.

¹⁸Zite aw, Toupa ah a kilawm hun bangjel in na pasalte uh kiang ah kituhlut un.

¹⁹Pasalte aw, na zite uh it unla, atung uah gilou kei un.

²⁰Tate aw, siljousiah ah na nulepate uh thu mang un, ajiak hihpen Toupa kipaksakna ahi.

²¹Pate aw, na tate uh hih thangpai kei un, atuachih keileh a lungkia khading uhi.

²²Silate aw, sil bangkim ah taksa a na pute uh thu mang un, mitmei veng a mihing kipaksak ding giap hilou in, lungsim a ginomtak in leh Pasian laukawm jaw in.

²³Tualeh na bawl taphot uh mihingte ding a bawl bang hilou in, Toupa ding bang in lungsim a chihtak tak in bawl un.

²⁴Toupa kiang a pat in nuamman ding gou na mu ding uh chih thei in. Ajiak pen Krist Toupa nna sepsak na hi uhi.

²⁵Hinanleh sil diklou bawltu in a sildiklou bawlman a mukik ding hi, kideihsak tuamna bangmah a om kei hi.