Read Thangal Naga KOLOSSATE 4 Bible Online

KOLOSSATE 4 - Thangal Naga bible

KOLOSSATE 4

¹Pute aw, nou zong van ah pu khat nanei uh chih thei in na silate uh tung ah adik leh akilawm hun bawl un.

²Lungluttak in thum jomjel unla, hua ah kipahthu gen kawm in kiveng jing un.

³Kolbulh a ka omna pen, Krist thugu`k gen ding a Pasian in kou ding a thugenna kot ahung honsak theihna dingin kou ding in zong hung thumsak un.

⁴Ka gen ding bangtak a ka genkhiat theihna ding in.

⁵Hun lemtang lei in, pualam mite lak ah pilvangtak in om un.

⁶Michih bang chibang a dawnding ahia chih na theihtheihna ding un na ham kamsuak uh chisoh hehpihna jau hi gige hen.

⁷Ka tanchin jousiah pen sanggam ittak Tikika nasemtu gin-om leh Toupa a ka sila hihpih in nou ahung theisak siang ding hi.

⁸Hua ding mah in amah na kiang uah kung sawl ahi, na tanchin uh atheih a, tualeh na lungtang uh a khamuansak theihna ding in.

⁹Onesima, sanggam gin-om leh it omtak, noulak a mi mah tawh, amau`n hihlam sil omdan jousiah ahung theisak ding uhi.

¹⁰Aristarkha, ka thong tangpih in chibai a hungbuk hi, Marka, Barnaba tupa in zong chibai a hungbuk hi, (amah tungtang ah thupiak na mu uh; na kiang ua a hungpaileh kipaktak in na pom un.)

¹¹Tualeh Jesu, Jasta zong achih uh, teptanmi in nou chibai a hungbuk hi. Hihte guak Pasian gam thu lam a ka naseppih ahung khamuantute ahi uhi.

¹²Epaphra, nalak ua mi, Krist sila in nou chibai a hungbuk hi. Pasian deihlam jousiah a hoihkim leh bukim a na dingdet theihna ding un amah pen thumna ah theihtawp suah in apang hi.

¹³Ajiak aman nou a ding leh, Laudisia leh Hirapoli khua a omte ding in phattuam angai mahmah chih kana theihpih hi.

¹⁴Luka, daktor ittak leh Dema in nou chibai a hungbuk hi.

¹⁵Laudisia khua a unau omte leh, Nimpha leh a inn a saptuam omte chibai hung buksak in.

¹⁶Tualeh hih laikhak nalak ua na simzoh chiang un, Laudisia saptuamte lak ah zong na simsak un. Tualeh tuachimah bang in nou zong Laudisia khua a laikhak pen na sim un.

¹⁷Tualeh Arkippa kiang ah, “Toupa a nasepna na muhpen hihbukim ding in pilvang in,” nachi un.

¹⁸Keimah Paul in, keimah khut a chibai kungbukna ahi, ka kolbulhte thei gige un! Hehpihna na kiang uah om hen. Amen.