Read Thangal Naga 1 THESSALONIKATE 2 Bible Online

1 THESSALONIKATE 2 - Thangal Naga bible

1 THESSALONIKATE 2

¹Ajiak pen unaute aw, nalak ua kung paina uh athawn ahikei chih noumau ngeiin nathei uhi.

²Hinanleh hua masang a na theihsa uh mahbang un, Philippi khua a ka thuakgimna uh leh jumhuaitak a bawlgawp a ka omnung un, buai pumpum in zong Pasian tangthupha na kiang ua gen dingin ka Pasian uah ka hangsanjaw sem uhi.

³Ajiak, ka thugen uh juau a kipan ahikei a, sianglou a pawt zong ahikei a, tualeh khembawlna in zong ahikei hi.

⁴Tangthupha kepsak a om ding a, Pasian phatsak mi ka hih mahbang un mihing kipaksak ding bang hilou a ka lungtang uh endiktu Pasian kipaksak hijaw in, thu ka genjel ding uh ahijaw hi.

⁵Ajiak bangmah chik in zong kimaitang phatna leh duh-amna thu hiam ka jangngai kei uh chih nathei uh, pahtawina ka jong ngaikei uhi!

⁶Krist sawltakte ka hihjiak un thuneihna zangthei himah nanle ung, mihing tung leh, nou tung leh, midangte tung ah zong pahtawina ka zong ngaikei uhi,

⁷hinanleh nu in a tate a duat bawl bangin nalak uah migitak in ka omjaw uhi.

⁸Tuachi`n, ka deihtakte uh nung hihtak jiak un nou hung ngaina mahmah in Pasian tangthupha guak hilou in, kou hinna tanpha hung piak ka ut uhi.

⁹Ajiak unaute aw, ka sepgim dan uleh ka gimdan uh na theigige uhi, nalak ua kuamah ka sukbuai louhna ding un sun leh jan a sem in Pasian tangthupha nou kung hilh uhi.

¹⁰Nou gingtute lak a siangthoutak leh, diktak leh, gensiatbei a ka gamtat dan uh ahung theihpihtute na hi uhi, Pasian zong.

¹¹Pa in tate tung a abawl bangin, nou hung hasot in, hung khamuan in, tualeh hunghilh in na tung ua ka bawl dan uh nathei uhi.

¹²Ama kumpi gam leh athupina-a nou hung samlutpa Pasianmi ding a chinna nei a na omtheihna ding un.

¹³Hih jiakin Pasian kiang ah tawplou in kipahthu ka gen uhi. Ajiak Pasian thu kou a pat a na jak uh na pom laiun, mihing thu bang a pom hilou in, hinanleh thutak, nou a gingtate a zong thupitak a nasemthei Pasian thu bang in na pomjaw uhi.

¹⁴Ajiak, unaute aw, Judea gam a Pasian saptuam pawl Krist Jesu a omte juitute na hi ua, amau`n Judate lak a athuak bang un, nou zong na gammite lak ah na thuak uhi.

¹⁵Hua Judate`n Toupa Jesu leh a Jawlneite uh athat ua, kou zong ahung bawlgenthei ua, tualeh Pasian a lungkimsak kei ua, mijousiah akalh uhi!

¹⁶Hundam a hihtheihna ding ua Jentelte kiang a thugen a hungkham ua, a khialhnate uh hihdim gige na dingin, hinanleh Pasian thangpaihna pen ahuaisia theitawp in atung uah a tungta hi!

¹⁷Hinanleh kou pen, unaute aw, tomnou khat sung lungtang lam hilou a, mellam guak kikhen a i om jiakin, kilawptak a namel uh muding in ka hahpan sem uhi!

¹⁸Tuajiakin, na kiang uah hungpai ka sawm ua, kei Paul ngeiin zong nihveijen hungpai ka sawmta a, hinanleh setan in a hungdal nak hi.

¹⁹Ajiak, ka kinepna uh hiam, ka kipahna uh hiam, ahihkeileh ka kipahna lallukhu uh bang ahia! A hungpai chiang a i Toupa Jesu Krist mai ah nou mahmah hilou ding na hi uh maw leh?

²⁰Ajiak noupen ka suan uh leh ka kipahna na hi uhi.