Read Thangal Naga 1 THESSALONIKATE 3 Bible Online

1 THESSALONIKATE 3 - Thangal Naga bible

1 THESSALONIKATE 3

¹Tuachi`n ka thuakzoh nawnlouh tak un Athen khua ah kouguak in nutsiat in omle ung hoih kasa ua

²tualeh i sanggampa uh Timothi Pasian nasemtu, Krist tangthupha lam a ka seppih uh, nou hung hihkip ding leh na ginna lam ua hung khamuan dingin kung sawl uhi,

³hua gimthuaknate jiak a kuamah a kilinglouhna ding in, ajiak hih silte thuak ding mawng a guat i hi uh chih noumah ngeiin nathei uhi.

⁴Ajiak, adiktak in, na kiang ua ka omlai un gimthuakna thuak ding ihi uh chih kung hilhkholhta uhi; huachibang ngeiin a tungta hi, huapen nathei uhi.

⁵Hihjiakin ka thuakzoh nawnlouh tak un, khemtu in nou ahung khem khading, ka sepgimna uh athawn khading chiin na gindan uh thei dingin mi kung sawl hi!

⁶Hinanleh Timothi tuin na kiang ua pat ka kiang uh a hungtun in na ginna uh leh na itna uh, tualeh kou nou kung muh nuam mahmah bang un nou zong kou hung munuam mahmah in nung theijing uh chih tanchin kipahhuaitak ahung puak hi.

⁷Tuajiakin, unaute aw, ka thuakgimna uh ka haksatna jousiah uh na ginna jiak un na tung uah khamuangtak in ka om uhi,

⁸Ajiak tuin ka hingta uh, Toupa a na dinkip phot uleh.

⁹I Pasian uh maiah na tung ua ka kipakna jousiah uh jiakin noulam thu ah Pasian kiangah bang chibang kipahthu ka gen tazen ding uai maw.

¹⁰Na mel uh kung muhtheihna ding uleh, na ginna lam ua na taksap uh kung hihbukimsak theihna ding un sun leh jan in hah thum in ka thum uhi.

¹¹Tuin Pasian ngei leh i Pa un, Toupa Jesu Krist in na kiang lam uah hung paipih hen!

¹²Tualeh noulam a itna ka hauh bang un, Toupa`n nou khat leh khat ki-it tuahna leh mi jousiah na itna uh hung khangsak in, hung hausakta hen.

¹³Tuachi`n i Toupa Jesu Krist, a misiangthoute jousiah tawh a hungpai chiangin Pasian, i Pa uh maiah na lungtangte uh siangthouna lam a dembeiin ahung hihkip thei ding hi.