Read Thangal Naga 1 THESSALONIKATE 4 Bible Online

1 THESSALONIKATE 4 - Thangal Naga bible

1 THESSALONIKATE 4

¹Tuachi`n unaute aw, atawppen in, na omdan ding uleh Pasian na kipahsak dan ding uh. Ka kiang ua kipan a nalak bang un na hauhsem na ding un. Toupa Jesu min in kung ngen un, kung hasot uhi.

²Ajiak pen Toupa Jesu jiakin bang chibang thute ahia kungpiak uh chih nathei uhi.

³Ajiak Pasian deihdan, na siangthouna ding uh ahihleh hih ahi, kingaih tawpsan un.

⁴Michih in siangthou leh zahtak tak a abel chiat uh kepdan atheih ding uh ahi.

⁵Pasian theilou Jentelte bang a huk lam a kipia lou in.

⁶Hualam thu ah kuamah aval a gamtang in a unau ze-khem in sil gilou bawlkei hen, Toupa, huachibang sil bawlte jousiah phu latu ahihjiak in, kou zong kung hilhkholh un, kung theisak khinta uhi.

⁷Ajiak pen Pasian in sianglou dingin a hungsam kei a, hinanleh siangthou dingin a hungsam jaw hi.

⁸Tuajiakin kuapeuh hih nial pen mihing nial ahikei a, Pasian, a Khasiangthou hungpiapa nial ahijaw hi.

⁹Hinanleh sanggam ki itna lam thu ah kung gelhsak na ngaikei uhi, ajiak pen ki-it tuah chiat ding in noumah ngei Pasian hilh in na om uhi.

¹⁰Mesidonia gam pumpi a unau om jousiah tung ah huapen na bawl ngutngei uhi, hinanleh unaute aw, hung khang semsem ding in kung ngen uhi.

¹¹Thu kung piak bang ua kamtawm deuh a om sawm a, na nna chiat uh ngaihsak a, tualeh na khut mahmah ua nasep sawm in.

¹²Tuachia pualam mite lam a kilawmtak a na omtheihna ding un leh, bangmah taksap na neihlouhna ding un.

¹³Hinanleh unaute aw, midang kinepna mawng mawng neiloute bang a na lungkham louhna ding un ihmute tungtang na theihlouh uh ka deihkei hi.

¹⁴Ajiak, Jesu asi a, a thoukik chih i gintat leh, tuachimah bangin Jesu-a ihmute zong Pasian in amah tawh ahung puikhawm ding hi.

¹⁵Hihpen Toupa thu in na kiang uah ka gen hi, eite Toupa hungpai dong a hing a na omlaite in ihmute i makhelh kei ding hi.

¹⁶Ajiak pen Toupa mahmah kikou aw tawh, vantungmi tungnung pen aw tawh, tualeh Pasian pengkul ging tawh van a kipat hung kumsuk ding ahi a, tualeh Krist a sisate a thoumasa ding ua;

¹⁷Tuazoh chiangin ei hing a na omlaite huihkhua ah Toupa tuakding in amauh tawh meipi lak ah laktouh in i om ding a, tuachi`n tangtawn in Toupa kiang ah i omta ding hi.

¹⁸Tuajiakin, hihthute in khat leh khat ki khamuan tuah chiat un.