Read Thangal Naga 1 THESSALONIKATE 5 Bible Online

1 THESSALONIKATE 5 - Thangal Naga bible

1 THESSALONIKATE 5

¹Hinanleh unaute aw, ahun leh ni lam thu ah kung gelhsak na ngaikei uhi.

²Ajiak nou mahmah in Toupa ni pen jan a guta bangin a hungtung ding hi chih chiantak in nathei uhi.

³“Muanna leh bitna,” chia agen laitak un numei nauvei bangin thakhat in manthaina atung uah a hungtung ding a, a suakta mawng mawng kei ding uhi.

⁴Hinanleh unaute aw, nou pen hua ni a guta bang a ahung bingphawn dingin mial ah na omkei uhi.

⁵Na un un vak tate leh sun tate na hi ua, jan a mi i hikei ua, mial a mi zong i hikei uhi.

⁶Tuajiakin midangte bangin i ihmu kei ding uh, kiging in i ngaihsakjaw ding uhi.

⁷Ihmute pen janin ahi a ihmut uh, tualeh uain khamte zong janin ahi a kham uh.

⁸Hinanleh ei sun a miten ginna leh itna awmphaw silh in, hundamna kinepna pen lukhu a khu in i ngaihsakjaw ding uhi.

⁹Ajiak Pasian in thangpaihna tuakding in a hungguat kei a, hinanleh i Toupa Jesu Krist jiakin hundamna ngahdingin a hungguat ahijaw hi,

¹⁰amah pen i tangin si a, ithoh in zong i ihmut in zong, amah tawh ihinkhawm theih na ding in.

¹¹Tuajiakin nana bawljel mahbang un ki khamuan tuah chiat unla, ki hihhattuah chiat un.

¹²Tualeh unaute aw, nalak ua semgimte leh, Toupa a na lamkaite uleh, nou hung hilhtute theijing un.

¹³Tualeh a nasep jiak un amauh thupitak a itna a ngaisang dingin kung ngen uhi. Kituak chiat in om un.

¹⁴Tuin unaute aw, kung hasot uhi, dan banglou a omte hilh unla, lungkiate khamuan unla, hatloute panpih unla, mi tengteng lak ah thuakjoutak in om un.

¹⁵Kuamah in kua gitlouh zong gitlouh a thuklou dingin pilvang un, hinanleh noulak hi in mi tengteng lak ah hitaleh ahoih taphot jui un.

¹⁶Nuam gige un,

¹⁷tawplou in thum un,

¹⁸sil bangkim ah kipahthu genjing un. Ajiak noulam thu ah Jesu Krist ah hih pen Pasian deihlam ahi.

¹⁹Kha sumit kei un;

²⁰Pasian thu kigen simmawh kei un.

²¹Sil jousiah enchian unla, ahoihlam taphot tu tinten un

²²giloulam jousiah a pat kihemkhia un.

²³Khamuanna Pasian ngeiin napum un hung hih siangthou hen, tualeh nakha uleh, na lungsim uleh na taksa uh i Toupa Jesu Krist hungpai chiang a gensiatbei ding in humbit in om hen.

²⁴Nou hungsampa a gin-om bangin, bawl zong a bawl ding hi.

²⁵Unaute aw hung thumsak un.

²⁶Unaute jousiah tawp siangthou in chibai kibuk un.

²⁷Hih laikhak unau siangthoute jousiah kiang ah simsak dingin Toupa min in thu kung pia hi.

²⁸I Toupa Jesu Krist hehpihna na kiang uah om hen. Amen.