Read Thangal Naga 2 THESSALONIKATE 1 Bible Online

2 THESSALONIKATE 1 - Thangal Naga bible

2 THESSALONIKATE 1

¹Paul, Sila leh Timothi in, I Pa uh Pasian leh Toupa Jesu Krist-a Thessalonika khua a saptuamte kiang ah:

²I Pa uh Pasian leh I Toupa Jesu Krist a kipan hehpihna leh khamuanna na kiang uah om hen.

³Unaute aw, na ginna uh nasatak a akhanlet a, na un ua na ki-it tuahna uh akhansem jiakin, na tungthu uah bawltuak ahihmah bangin Pasian kiang ah kipahthu genjing ding mawng ahi.

⁴Tuachi`n miin ahung bawl gentheihnate uleh, na thuakgimna jousiah ua na thuakzoh dan uleh na gindan jousiah uh jiakin Pasian saptuam pawlte lak ah kung suang mahmah hi.

⁵Hihpen Pasian gam mi hitak a guat na hihtheihna ding ua Pasian vaihawmna diktak chiamtehna chiantak ahi a, huading mah a zong thuak na hi uhi.

⁶Nou hung hihbuaite gimthuakna a thuk pen Pasian a ding a sil diktat-huai ahi chih thei in,

⁷tualeh nou hihgim a omte pen, Toupa Jesu van a kipan a a vantungmi hattak tawh a hung kilak chiangin, kou tawh khawlna a piakthuk kik a om in,

⁸meikuang ahung kilak chiangin, Pasian theiloute leh I Toupa Jesu Krist tangthupha thu mangloute tung ah phuba la in.

⁹Hihte jousiah Toupa maiah leh asil bawltheihna thupitak a kipan in tangtawn manthaina ah gawt in aom ding uhi,

¹⁰huani a misiangthoute a hihthupi a om ding leh agingta jousiahte a lamdang sak a om ding a ahung pai chiang in.

¹¹Tuajiakin, I Pasian un nou ahung sapna a saptaak him ahung sakna dingin. Tualeh hoih utna jousiah leh ginna nasep jousiah asil bawltheihna tawh ahung bukimsak theihna dingin, nou a dingin zong ka thum gige uhi.

¹²I Pasian uleh Toupa Jesu hehpihna dungjui a, I Toupa uh Jesu min pen nou a, tualeh noumah a hihthupia aom theihna ding in ka thum uhi.