Read Thangal Naga 2 THESSALONIKATE 3 Bible Online

2 THESSALONIKATE 3 - Thangal Naga bible

2 THESSALONIKATE 3

¹Atawppen in unaute aw, Toupa thu noumauh a aom bang a kintak a khang a hihthupi a a omtheihna ding leh,

²tualeh mi genhakte leh mi giloute lak a ka bitna ding un hung thumsak un, ajiak pen mi jousiahin ginna a neisiang kei uhi.

³Hinanleh Toupa a gin-om a, aman nou ahung hihkip ding a, silgilou lak ah a hungveng ding hi.

⁴Tualeh kung thupiakte uh na bawl ua, na bawljel ding uh chih Toupa ah kung muang uhi.

⁵Tuin Toupa`n na lungtangte uh Pasian itna ah leh Krist ding a thuakzohna ah hung kailut hen.

⁶Hinanleh unaute aw, kou a pat namuh uh thugousiah bang a omlou a, dan banglou a gamtang unaute jousiah lak ah ki hemkhia ding in I Toupa Jesu min in thu kungpia uhi.

⁷Ajiak pen noumah ngeiin nungjuih danding uh nathei uhi, ajiak nalak uah dan banglou in ka gamtang kei uhi.

⁸Kuamah tanghou zong athawn in ka nekei ua, hinanleh nalak ua kuamah kung hihbuai louhna ding un sun leh janin ka semgimjaw uhi.

⁹Thuneihna ka neihlouh jiak uh ahikei a, hinanleh nung juihding ua etton ding ka bawl uh ahijaw hi.

¹⁰Na kiang ua ka omlai un zong, “Kuapeuh in nna asep nuam keileh nek zong nekdah hen, chih thu kungpia uhi.”

¹¹Ajiak nalak ua dan banglou a gamta, nna mawng mawng semlou a, hinanleh mi nasepna va gensiatsak mi khenkhat aom uh chih kaja uhi.

¹²Huachibang mite pen hamtamlou a nna sem kinken ding leh, amauh tanghou kinek dingin Toupa Jesu Krist minin thu pia in ka hasot uhi.

¹³Hinanleh unaute aw, noujaw silhoih bawl chimtak kei un.

¹⁴Tualeh kuapeuh in hih laikhak a ka thu uh ajuih keileh, huami pen chiamteh unla. Kithuahpih kei un, a jumtheihna dingin.

¹⁵Hitalehzong melma bangin bawl kei unla, hinanleh unau bangin taihilhjaw un.

¹⁶Tuin khamuanna Toupa amah mah in bangkim ah, bangchiklai peuh in nou khamuanna hungpia jing hen, Toupa`n na un un hung ompih jingta hen.

¹⁷Hih ka chibai bukna laikhak pen kei Paul in ka khut ngei a ka gelh ahi, ka laikhak tengah chiamtehna ahi, hichi bang a ka gelhjel ahi.

¹⁸I Toupa Jesu Krist hehpihna na kiang uah om hen. Amen.