Read Thangal Naga 1 TIMOTHI 1 Bible Online

1 TIMOTHI 1 - Thangal Naga bible

1 TIMOTHI 1

¹Paul, I hundampa uh Pasian leh, i kinepna uh Toupa Jesu Krist thupiak bang a Jesu Krist sawltak in

²Ginna a ka tapa taktak Timothi kiang ah, Pasian I Pa uh leh, I Toupa Jesu Krist kiang a kipan, hehpihna leh, zahngaihna leh, khamuanna omta hen.

³Mesidonia gam a ka pai ding kuan a, Ephesa khua a na omgige uh ka deih a, mi khenkhat in kihilhna diklou a hilhlouhna ding leh,

⁴ginna a Pasian ngaihsakna kichilna ompen hilou a, kiselna piangsak tangthu pouh leh tangthu sutsenglouh maimai a ngaihsaklouh na ding ua, hilh ding a kung nget bang un, huachin bawl in.

⁵Tualeh thupiak kipiak jiak ahihleh, lungtang siangthou leh, sia leh pha theihna hoih leh, ginna diktak a itna a kipan ahi.

⁶Mi khenkhatten hihte pialsan in, thu ginalou genna lam ah a kiheimang santa uhi.

⁷A thugen uleh sil ahi a agente uh zong bang ahia chih theichian loupi in, danthu hilhtute hih a ut uhi.

⁸Hinanleh mi`n dan ahibangtak a ajak leh, dan pen ahoih chih ithei uhi.

⁹Hih thei in, hua dan pen mi diktatte ding a bawl ahi kei a, hinanleh thumanglou leh genhakte a ding, Pasian ngaihsaklou leh mikhialte a ding, mi siangloute leh Pasian zahloute a ding, pate thatte leh nute thatte a ding, mihing thatte a ding,

¹⁰kingaihhatte a ding, pasal leh pasal kipawl thanghuaite a ding, mihing gutute a ding, juauhatte a ding, dikloupi a kichiamte a ding, tualeh thugin tawh kikalh sildang a omleh huate a dingin ahi.

¹¹Ka kiang a kepsak a om, pahtawitak Pasian thupitak tangthupha dungjui in.

¹²Tualeh nasemtu a hungkoih a, gin-om a ahung sim jiakin, ahung hitheisaktu Jesu Krist, I Toupa uh ka phat ahi,

¹³tu masang in Pasian gensiatu, bawl gentheitu leh simmohtu na himahleng zong. Hinanleh zahngaihna ka muta hi, ginglou pi a theilou a ka bawl ahihjiak in.

¹⁴Tualeh I Toupa uh hehpihna pen Krist Jesu a om ginna leh itna in adimlet hi.

¹⁵Krist Jesu pen mikhialte tan ding in leitung ah a hungpai hi chihthu gintat om leh, pomtak mahmah ahi. Hua mikhialte lak ah kei alianpen ka hi,

¹⁶ahihhangin, tunung chiang a tangtawn hinna ding a amah hung gingta dingte etton ding in Jesu Krist in a thuakzoh dan keimah a ahihlat masak theihna dingin hih jiakin zahngaihna ka mu hi.

¹⁷Tuin tangtawn kumpipa sitheilou, muhtheihlouh Pasian pil khat guak kiang ah zahna leh thupina tangtawn tangtawn in omta hen! Amen.

¹⁸Ka tapa Timothi aw, tu masang a tangthupha na kiang a ka genkholh thute dungjuiin hih thupiakte kung pia hi. Huate a kidouna hoih na doutheihna ding in,

¹⁹ginna leh sia leh pha theihna hoihpen tukip in, huapen mi khenkhatte in a paikhia ua ginna lam ah longsia bangin a kehgawpta uhi.

²⁰Amauh lak ah Haimena leh Aleksander ahi uh, Pasian gensiatlouh ajil theihna ding un amauh pen setan ka piata hi.