Read Thangal Naga 1 TIMOTHI 3 Bible Online

1 TIMOTHI 3 - Thangal Naga bible

1 TIMOTHI 3

¹Kuapeuh saptuam lamkai hih ut in nahoih sep a ut ahi, chih adik hi.

²Tuachi`n saptuam lamkai ding pen gensiat bei, zi khat nei, kidekthei, chihtakna lungsim nei, gamtathoih, mi pahtakdan siam, thuhilh siam;

³uain kham hatlou, mivuak hatlou, dangka duh-amlou, hinanleh migi, misel hatlou, mi enghatlou;

⁴ama innsung kizentak a kemsiammi, zah omtak a atate kemsiammi, ahih ding ahi.

⁵Ajiak pen miin ama innsung bawn vaihawm dan a theihkeileh, bangchiin Pasian saptuamte a enkol thei dia?

⁶Gingthakmi ahihlouh ding ahi, atuachih keileh aki sathei khading a, setan siamlouh tanna ah apuk khading hi.

⁷Tualou zong, pualam mite genphat ahih ngeingei ding ahi, atuachih keileh gensiat a om in setan thang ah a awk khading hi.

⁸Tuachimah bangin, saptuam upate pen mi zah om, kamtam lou; uain hailou, dangka duh-amlou, ahih ding uh ahi;

⁹sia leh pha theihna siang a ginna thugu`k kemmi ahih ding ahi.

¹⁰Hinanleh hihte ah etchian in om masa uh henla, tuazoh chiangin gensiat bei ahih uleh saptuam upa nna sem uh hen.

¹¹Tuachimah bangin azite uh zong mi zah-om ahih ngeingei ding uh ahi, kamtam lou, kidekthei, sil jousiah a gin-om ahih ding uh ahi.

¹²Saptuam upate pen zi khat nei, a tate leh a innsung uh kizentak a vaihawm siammi hi hen.

¹³Ajiak pen saptuam upa nna hoihtak a semten dinmun hoihtak leh Krist Jesu a om ginna lam a hangsanna thupitak amu uhi.

¹⁴Tomkhat zoh chiang a na kiang ua hungpai kinem in hihthute na kiang uah kung gelh hi.

¹⁵Hinanleh kung zekai khak leh, Pasian innkuan sung a bang chibang a gamta ding na hia chih na theihna dingin kung gelh ahi, huapen Pasian hing saptuam, thutak khuam leh kingakna ahi uhi.

¹⁶Tualeh Pasian ngaihsakna thugu`k pen nial guallouh in athupi ahi: Pasian pen taksa in ahung kilang a, Kha in siam atang a, vantungmiten amu ua, Jentelte kiangah tangkoupih in a om a, leitung ah gintat in a om a, thupitak a laktouh in a omta hi.