Read Thangal Naga 1 TIMOTHI 5 Bible Online

1 TIMOTHI 5 - Thangal Naga bible

1 TIMOTHI 5

¹Putekte phawk kenla, hinanleh pa bang in, tangval deuhte sanggam bang in,

²pitekte nu bang in, nungakte sanggamnu bang in siangthoutak in hasot in.

³Meithaite, meithai taktakte zahbawl in.

⁴Hinanleh meithai kuapeuh in tate hiam, tute hiam aneihleh, amauh innsung ah Pasian ngaihsakdan leh annu leh pate zahdan jil masa uhen; ajiak Pasian muh in huapen ahoih a, tualeh apomtak hi.

⁵Tualeh meithai taktak, amahtang a om in pen Pasian ah kinepna anei a, sun leh jan a ngen in a thum gige hi.

⁶Hinanleh ama nopsakna a hingnu pen adamlai in zong asi ahi.

⁷Tualeh gensiat beia a omtheihna dingin hih thute pia in.

⁸Hinanleh kuapeuh in ama mite a ding, adiak a ama innkuante a ding a ngaihtuahsak keileh ginna ajuausan a, gingloumi sangin a giloujaw ahi.

⁹Meithai kum sawm guk nuailam, mikhat zi na hita pen meithai a simlouh ding ahi.

¹⁰Silhoih bawl lam a mi pahtawi a om a, tate vakkhang a, mikhualte na jintun a, misiangthoute keng na silsakta, mi gimthuakte na panpihta, silhoih taphot thanuamtak a na bawljou ahihleh.

¹¹Hinanleh meithai nungak deuhte pen gelh ken, ajiak Krist deihlouhlam a ahung beveng chiang un pasal neih a ut paipai uhi,

¹²a ginna masa uh apaih jiak un siamlouh tangin a om uhi.

¹³Tualeh huate ban ah, innchin ah avak kawikawi ua, thadah achi`ng uhi, tualeh thadah guak hilou in, gen louhlouh ding gen in, kamtam leh midemhat ahi uhi.

¹⁴Tuajiakin meithai nungak deuhten pasal nei uhenla, innsung khawsak ngaihtuah uhenla, gensiatna ding lemtang mawng mawng melma musak kei le uh ka deih hi.

¹⁵Ajiak tu in zong mi khenkhat setan lam ah apial khiata uhi.

¹⁶Gingtu numei hiam pasal hiam in meithai aneihleh panpih uhen, meithai taktakte apanpih theihna dingin saptuam hihbuai in omkei hen.

¹⁷Saptuam upa vaihawm hoihte pen alehnih a zahbawl tuak a seh hi uhen, adiak in thu leh thuhilhna lam a semgimte.

¹⁸Ajiak Laisiangthou in, “Bawngtal in buh achillai-in amuk kan ken,” tualeh “Nasemtu pen thaman mutak ahi,” achi hi.

¹⁹Saptuam upa ahekna uh pen, theihpihtu nih hiam thum hiam lou in pom ken.

²⁰Mikhialte pen midangten zong alau theihna ding un, mijousiah mai ah taihilh in.

²¹Khentuam neia bangmah bawllou a, deihsaktuam neilou a hih thute jui dingin, Pasian leh Toupa Jesu leh vantungmi telte mitmuh ah thu kungpia hi.

²²Mi kuamah tungah khut nga paipai kenla, midangte khialhna ah zong kikum ken; siangtakin kikoih jing in.

²³Na gilpi jiakin leh na damlouh jel jiakin tuiguak dawn nawn kenla, hinanleh uain themkhat khat zangjel in.

²⁴Mi khenkhat khialhnate pen a malat a, vaihawmna ah atung masa jel hi; hinanleh mi khenkhatte a pen anung uah ajui hi.

²⁵Tuachimah bangin khenkhatte silhoih bawl kilang masa aom a, tuachibang loute zong phualtheih ahikei hi.