Read Thangal Naga 2 TIMOTHI 1 Bible Online

2 TIMOTHI 1 - Thangal Naga bible

2 TIMOTHI 1

¹Paul, Jesu Krist a om hinna thuchiam dungjui a Pasian deihna bang a Jesu Krist sawltak in;

²ka tapa deihtak Timothi kiang ah: Pa Pasian leh Krist Jesu I Toupa kiang a kipan a hehpihna leh, zahngaihna leh, tualeh khamuanna om hen.

³Sun leh jan a tawplou a ka thumnate a kung theihjing jiakin, kapi leh pute nabawl mahbang in sialehpha theihna siangtak neia a nna ka sepjingpa ka Pasian kiangah kipahthu ka gen ahi.

⁴Kipahna a ka dimtheihna dingin na khituite theijing in, nangmah hung muh ka ut mahmah hi.

⁵Ginna taktak nangmah a ompen ka theigige a, hua ginna pen amasapen in napi Loisi ah aom a, nanu Iunisi ah zong aom a, tualeh nangmah ah zong aom chih chiantakin ka thei hi.

⁶Tuajiakin, ka khutngak jiak a Pasian silpiak nangmah a ompen mutkuang dingin kung theisak kik hi.

⁷Ajiak Pasian in launa kha a hungpia kei a, hinanleh sil bawltheihna leh, itna leh, lungsim siangthouna kha a hungpia jaw hi.

⁸Tuajiakin I Toupa thu theihsakna pen jumpih kenla, kei amah a hen tapa zong hung jumpih ken, hinanleh Pasian sil bawltheihna bangjel a tangthupha jiak a gimthuakna thuakpihtu hijaw in.

⁹Aman i silbawlte dungjui hilou in, ama guat leh hehpihna dungjuiin ahung hundam a, sapna siangthou in ahung samta hi. Hihpen lei kisiam masang a Krist Jesu a ahung piak ahita hi.

¹⁰Hinanleh ahung hundampa Jesu Krist kilakna jiakin tuin hihhat in a omta hi, aman sihna hihmang in tangthupha jiakin hinna leh sihtheihlouhna pen vak ah a hungtunta hi.

¹¹Hua tangthupha pen Jentelte theisak dingin thugentu ding leh, sawltak ding leh thuhilh sia ding a guat ka hi hi,

¹²tualeh hihjiak in ahi hih silte zong ka thuak. Hinanleh zong ka jum kei hi, ajiak ka gintatpa ka thei hi, tualeh akiang a ka kepsak huani a dingin a kembitthei chih chiantak in ka thei hi.

¹³Krist Jesu a om itna neiin, thudikdan ka kiang a na jakte tukip in.

¹⁴I sung a om Khasiangthou in nang ahung kepsak thutak kemhoih in.

¹⁵Asia gam a omjousiahte kei a pat a pialmangta uh chih nathei hi, alak uah Phigela leh Hermojini apang uhi.

¹⁶Toupa`n Onesiphora innkuanpihte kiang ah zahngaihna pia hen, ajiak aman ahung hihhalh jeljel a, ka kolbulh zong a jumpihkei hi,

¹⁷Rom khua a hungtun in ahung limzon a, ahung mukhia hi.

¹⁸Huani chiang a Toupa kiang a amuh ding Toupa`n phalsak hen! Tualeh Ephesa khua a sil tampi a ka nna asep jiak hoihtakin nathei hi.