Read Thangal Naga 2 TIMOTHI 2 Bible Online

2 TIMOTHI 2 - Thangal Naga bible

2 TIMOTHI 2

¹Tuajiakin nang, ka tapa Krist Jesu a om zahngaihna ah hattak in om in;

²tualeh theihpihtu tampi lak ah ka kiang a thu naja`kte huate pen mi muanhuai, midangte zong hilhsawnthei dingte kiangah kemsak in.

³Tuajiakin Jesu Krist galkap hoihtak bangin gimthuak hung thuakpih in.

⁴Galkap hiding a telpa a kipahsak theihna dingin; galkap kuamah kidoulai in hih damsung khuasaknate in a kihihbuai ngaikei hi.

⁵Tualeh kidemnate ah mi pang nanleh zong dan bang a a bawlkeileh khuksak in aom tuankei hi.

⁶Louneitu semgim in agah tangmasapa ahi ding hi.

⁷Ka thugen ngaihtuah in, Toupa`n nangpen sil jousiah ah theihsiamna a hungpia ding hi.

⁸Jesu Krist, David suan a mi pen, ka tangthupha gen dungjui in misi lak a kipat kaithoh in aom hi chih theijing in,

⁹hua tangthupha jiakin silgilou bawlte bangin hen a om in haksatna ka thuaklawh hi. Hinanleh Pasian thu pen hen in a omkei hi,

¹⁰Tuajiakin Krist Jesu a om hundamna pen, tangtawn a om thupina tawh a muhtheihna ding un, telte jiakin sil jousiah ka thuak hi.

¹¹Hih thugen adik hi: “Ajiak amah tawh sita ihihleh, amah tawh i hingkhawm ding a.

¹²I thuakleh, amah tawh vai i hawmkhawm ding a. amah i kitheihmoh bawl leh, aman zong ahung kitheihmoh bawl ding hi.

¹³Eite gin-om keilei zong, amah a gin-om jing a, amah leh amah a kitheihmoh bawltheih sam kei hi.”

¹⁴Thu phatuamlou, a ngaikhiatute a ding a siatna higiap thu a kiniallou dingin hihthute theisak jing inla, Toupa maiah thu pia in.

¹⁵Thutak thu diktak a khen in, jumna ding neilou nasemtu bang a, Pasian pomta`k hiding a nangmah kipia dingin theihtawp suah in.

¹⁶Hinanleh Pasian zahta`klouhna thugen mawk mawkte taisan in, ajiak huachibangte`n mite Pasian ngaihsaklouh lam ah apui gamla deuhdeuh uhi.

¹⁷Tualeh athu un meimasia nek bangin amauh ane ding hi. Alak uah Himenais leh Philetas apang uhi.

¹⁸Huachibang mite`n thutak apialsan ua, thohkikna aom khinta chi`n mi khenkhatte ginna a sukmangsak hi.

¹⁹Hinanleh Pasian suangphum kippen ading nalai a, hih chiamtehna anei hi: “Toupa`n amah a hi te athei hi,” tualeh, “Michih Krist min lou taphot in gitlouhna paisan hen,” chih.

²⁰Hinanleh inn thupi sung ah kham leh sumsan belte guak aom kei a, sing leh leia bawl bel zong aom hi, khenkhat manphatak a zak ding in, khenkhat manphaloutak a zak ding in.

²¹Tuajiakin mi hua silninte lak pan a aki suksiangleh, apu ding a bel it-huai, siangthou, apu a ding a zaktaak, silhoih jousiah a ding a mansa a om bang ahi ding hi.

²²Khangnou utnate taisan inla, hinanleh lungtang siangthou a Toupa samte tawh diktatnate, ginnate, itnate, lemnate, delhjaw in.

²³Hinanleh kihaunate apiangsak veu chih thei in; kiselna mot-huai leh pilhuailoute ah pang ken.

²⁴Tualeh Toupa silate pen kisel ding ahikei a, hinanleh mijousiah tung a migitna, thuhilhsiam, thuaktheihna ahijaw ding ahi,

²⁵Pasian in thutak atheihna ding un kisi`kna apiak khak leh chiin a kalhtute pen kingiamkhiat tak in a thuhilh ding ahi.

²⁶Tuachi`n khua ahung theithei ding ua, amauhte sila ding a man a aut ut a bawlpa setan thang a kipan a suakta thei ding uhi.